Urxencia no Rosal atendida por unha médica xubilada e sen ambulancia: 230m en padiola por estrada ata o helicóptero

A Plataformas en defensa da sanidade pública do Rosal, A Guarda e Oia, denuncia os feitos ocorridos o pasado venres. O afectado tivo que ser trasladado en padiola durante 200m para poder trasladalo en helicóptero ao hospital. 

O suceso ocorreu nun momento no que o centro de saúde quedou sen a atención da única médica do centro. Tivo que atender a urxencia unha médica xubilada. Os feitos espertaron a indignación dos veciños.

Foto: EP

Plataformas en defensa da sanidade pública do Rosal, A Guarda e Oia denuncian que este venres un paciente tivo que ser trasladado en padiola durante máis de 200 metros desde o Centro de Saúde do Rosal ata o helicóptero medicalizado ante a falta dunha ambulancia medicalizada na localidade pontevedresa.

Segundo relatou a plataforma da Guarda nunha nota de prensa, o venres a única médica que atendía neste centro de saúde desprazouse cun paciente en ambulancia ao hospital de referencia en Vigo. Nese período de tempo presentouse outra urxencia que tivo que ser atendida por "a médica xubilada, non contratada para estas funcións".

SEN AMBULANCIAS

Así, continúan, ante a falta de ambulancias, o 061 enviou un helicóptero medicalizado, pero o paciente tivo que ser trasladado en padiola 230 metros ata a aeronave polo persoal do centro e do 061 e ademais, ao mesmo tempo, produciuse na Guarda outra emerxencia sanitaria na que tamén se requiría unha ambulancia.

Ante esta situación, as plataformas sanitarias denuncian que "se pon de manifesto unha vez máis carencias como un número insuficiente de ambulancias asistenciais, carencia dunha ambulancia medicalizada e falta de persoal sanitario".

O TEMPO PODE SER CRUCIAL

Neste sentido, engaden que "é sabido" que en determinadas urxencias o tempo pode ser crucial para salvar a vida ou minimizar secuelas.

Por iso, demandan á Xunta de Galicia peticións concretas: dotar aos centros de saúde destas localidades do persoal sanitario que lles corresponde, fixar de maneira permanente o segundo equipo de urxencias do PAC da Guarda e dotalo dun profesional de enfermería e dotar ao Baixo Miño dunha ambulancia medicalizada e aumentar as ambulancias asistenciais.