Restricións covid Galicia: o SERGAS elimínaas en hostalería a pesar de recoñecer unha incidencia "elevada"

Os últimos datos coñecidos hoxe confirman unha tendencia á alza e unha transmisión moi importante. A Xunta recoñéceo no DOG, pero aínda así segue adiante coa eliminación das restricións polo coronavirus. 

Na práctica, só está vixente o certificado covid para visitar enfermos en hospitais ou persoas en asilos e outras residencias de dependentes.

Os datos oficiais do Ministerio indican que Galicia é a terceira comunidade con maior transmisión entre os maiores de 60, que é practicamente o único colectivo ao que se lle fan probas cando hai síntomas compatibles.

 
A hostalería de Galicia quedará sen restricións pola pandemia pola Covid-19, máis aló do uso obrigatorio de momento de máscara en interiores cando non se consome, ao decaer este sábado a limitación de comensais por mesa.

Así o confirmaron por parte da Consellería de Sanidade, en relación a prorrógaa en vigor ata as 00,00 horas do 9 de abril da limitación de 10 comensais por mesa en interior e de 20 en exterior, que decae este sábado.

QUE RESTRICIÓNS HAI VIXENTES POLA COVID EN GALICIA?
Por tanto, á marxe da medida común en toda España do uso de máscara en interiores, que previsiblemente se eliminará o día 20, con algunhas excepcións --como hospitais e residencias--, Galicia mantén únicamemte ata as 00,00 do 23 de abril a esixencia do certificado de vacinación, recuperación ou proba diagnóstica negativa para visitar aos pacientes ingresados en centros hospitalarios e sociosanitarios residenciais de maiores e de persoas con diversidade funcional.

Respecto diso, segundo a orde publicada este 8 de abril no Diario Oficial de Galicia (DOG) pola Consellería de Sanidade, recollida por Europa Press, mantense esta medida "atendendo á evolución da situación epidemiolóxica".

Sanidade concreta que "en cumprimento dos principios de necesidade e de proporcionalidade, as medidas previstas nesta orde serán obxecto de seguimento e avaliación continua a fin de garantir a súa adecuación á evolución da situación epidemiolóxica e sanitaria". "Como consecuencia deste seguimento e avaliación, as medidas poderán ser prorrogadas, modificadas ou levantadas mediante orde da persoa titular da consellería competente en materia de sanidade", engade.

ALTA TRANSMISIÓN 
Segundo o informe da Dirección Xeral de Saúde Pública, do 5 de abril de 2022 referido no DOG, na actualidade a situación epidemiolóxica, coa estratexia de vixilancia e control fronte á Covid-19 tras a fase aguda da pandemia vixente desde o 28 de marzo de 2022 centrado en persoas vulnerables (de 60 ou máis anos, inmunodeprimidas, embarazadas) ou relacionadas con ámbitos vulnerables (centros sanitarios asistenciais, centros sociosanitarios, centros de día, etc.) e as que precisan ingreso hospitalario, ao 30 de marzo as taxas de incidencia a 7 e a 14 días en persoas de 60 ou máis anos" continúan sendo elevadas, con valores de 349,95 e 846,74 casos por 100.000 habitantes, respectivamente".

A porcentaxe de positividade das probas diagnósticas realizadas en persoas de 60 ou máis anos entre o 22 e o 28 de marzo foi do 19,8%, valor que supera o 3% establecido en Galicia como nivel deste indicador de seguimento, indica Sanidade. Do 26 ao 30 de marzo notificáronse un total de 2.147 casos novos de Covid-19 en persoas de 60 ou máis anos.

HOSPITALIZACIÓNS  
"En canto á situación da capacidade asistencial, a taxa de ocupación de pacientes con Covid-19 por 100.000 habitantes é de 14,91, valor superior ao observado fai sete días, en que era de 13,44 ingresos por 100.000 habitantes", indica. Nas unidades de coidados críticos (UCI) tamén se observa un aumento, pasando de 0,52 ingresos por 100.000 habitantes o 22 de marzo a 0,70 ingresos por 100.000 habitantes o día 30 do mesmo mes, engade.

No últimos sete días, a taxa de novos ingresos por 100.000 habitantes foi de 13,28 e de 0,52 ingresos por 100.000 habitantes na UCI. Obsérvase tamén un aumento na porcentaxe de camas ocupadas por pacientes con Covid-19, pasando do 4,3% na semana previa ao 4,7% na data de publicación do informe do Ministerio de Sanidade.

A porcentaxe de ocupación de camas na UCI por este tipo de pacientes tamén presenta un aumento, ao pasar de 1,88% ao 2,55% no mesmo período. Segundo a última actualización do Ministerio de Sanidade, o número de persoas hospitalizadas en Galicia ascende a 402 e na UCI a 19.

"RISCO MEDIO"
"Como resumo, as taxas de incidencia a 7 e a 14 días nas persoas de 60 ou máis anos, grupo poboacional considerado vulnerable, continúan mostrando uns valores elevados e, segundo a valoración do risco da Estratexia de vixilancia e control fronte á Covid-19, tras a fase aguda da pandemia, do Ministerio de Sanidade, actualizada o 23 de marzo de 2022, situaríanse en risco medio", expón.

Por outra banda, os indicadores do nivel de utilización de servizos asistenciais pola Covid-19 "presentan un empeoramento con respecto á semana previa á publicación do informe do Ministerio", indica Sanidade, "e, aínda que a maioría atópanse dentro dos límites que definen o risco baixo, unicamente dous indicadores (porcentaxe de ocupación de camas de UCI por casos de Covid-19 e taxa de ingresos en UCI por 100.000 habitantes) están no nivel de circulación controlada definido polo ministerio na estratexia mencionada anteriormente".

"Por iso, a pesar de que a nova Estratexia de vixilancia e control da Covid-19 implica aceptar un certo nivel de transmisión do SARS-CoV-2 en poboacións vacinadas e novas, nas cales a infección ten un impacto poboacional menor en termos de gravidade, é preciso continuar dirixindo as actuacións á protección das persoas e ámbitos de maior vulnerabilidade e a prórroga da obrigatoriedade de exhibir o certificado Covid para o acceso ao interior dos centros hospitalarios, hoteis de pacientes e centros sociosanitarios, por constituír unha medida adicional de seguridade que supoñerá unha diminución do risco de transmisión nestas contornas", xustifica.

Ante a situación actual, coas taxas actuais de incidencia a 7 e a 14 días, con "unha elevada porcentaxe de positividade das probas diagnósticas realizadas e cunha clara prevalencia da variante Ómicron, que ten unha transmisibilidade superior á do variante Delta", para Sanidade, "está xustificada a necesidade de manter as medidas adoptadas para facer fronte a esta situación".