Alerta por importantes choivas nos próximos días en Galicia, sobre todo nas noites do venres e do domingo

Nalgunhas comarcas poderían caer máis de 40 litros en doce horas, principalmente na madrugada do venres ao domingo. No litoral o temporal traerá ventos chegarán a ser de forza 8, é dicir de ata 74 quilómetros horos, segundo a escala Beaufort.

Mapa de alertas meteorolóxicas para mañá venres segundo Meteogalicia

 
'Meteogalicia' advirte da chegada dunha fronte "moi activa" que repercutirá na Coruña e interior de Pontevedra con abundantes precipitacións este venres de madrugada. Ademais, existe unha alerta laranxa na Costa da Morte e en Coruña noroeste por ventos no mar do suroeste con intervalos de forza 8 desde a medianoite ata as 9,00.

HORARIOS DE ALERTAS
As precipitacións caerán desde a medianoite na Coruña ata o mediodía con máis de 40 litros/metros cadrados previstos. No interior de Pontevedra estas choivas prevese que se inicien ás 3,00 e que finalicen sobre as 15,00, cunha contía estimada similar ás da Coruña. 

 

O vento no mar tamén soprará na Mariña luguesa, pero con menor intensidade que na Costa da Morte e Coruña noroeste. Doutra banda, haberá refachos de vento de ata 80 km/h na Mariña, montaña de Lugo e montaña de Ourense.

O TEMPO MELLORARÁ A FIN DE SEMANA
Desta forma, os ceos nubrados e as precipitacións marcarán a fin de semana previa a Semana Santa. Ademais do episodio de choivas intensas deste venres pola madrugada, as predicións de 'Meteogalicia' estiman que o domingo pola noite será outro dos peores momentos meteorolóxicos nos próximos días.

O resto do venres, o ceo estará cuberto de nubes con choivas persistentes pola mañá, mentres que pola tarde estes chuvascos serán máis intermitentes. Pola súa banda, as temperaturas non variarán e manterase un ambiente tépedo e o vento manterá unha tendencia moderada.

Para o sábado rexistrarase un descenso das temperaturas mínimas, mentres que as máximas ascenderán lixeiramente. Espérase unha xornada con ceos parcialmente nubrados, pero sen apenas precipitacións. Esta vez o vento soprará frouxo de compoñente sur.

Por último, o domingo rexistrarase un día de transición. Pola mañá espéranse ceos con nubes e claros, pero durante a tarde aumentará a cantidade de nubes con posibilidade dalgún chuvasco débil e ocasional. A noite traerá choivas xeneralizadas, as temperaturas ascenderán lixeiramente e o vento soprará do sur moderado con intervalos fortes no litoral.

UN MARZO HÚMIDO E CON TEMPERATURAS NORMAIS
'Meteogalicia' tamén publicou o informe mensual de marzo, que define como un período húmido e con temperaturas normais. En termos xerais, as choivas foron superiores aos valores habituais e a temperatura media non se afastou dos parámetros normais do mes.

En marzo os meteorólogos establecen dous partes diferenciadas: unha na que predominaron as situacións invernais, con precipitacións e baixas temperaturas, e outra máis seca, con temperaturas algo superiores pero con certa inestabilidade e poucos días de ceo despexado.

Destaca a chegada de borrascas e frontes continuos que propiciaron choivas intensas desde o 7 ao 14. O outro momento importante do mes foi o 15, cando a borrasca 'Celia' provocou a chegada dunha masa de aire do norte de África que deixou unha importante entrada de po subsahariano.