A praia nudista de Figueiras desbanca á de Rodas como o mellor areal das Cíes para The Times
O diario inglés pon en mellor consideración á praia de Figueras por encima da súa veciña, a de Rodas, considerada no seu día como a praia máis fermosa do mundo polo xornal británico The Guardian.
A de Figueiras é a única galega na listaxe das 19 mellores praias de España para o diario.
Praia de Figueiras | Foto: Turismo.gal
O diario británico The Times publicou esta semana un artigo no que nomea a praia de Figueiras, nas Illas Cíes, no cuarto posto dunha lista dos 19 mellores areais de España, e recomenda visitar o arquipélago en setembro ou outubro "cando as multitudes das vacacións diminuíron".
Na publicación, The Times destaca que esta praia está a poucos pasos doutro areal das illas, a praia de Rodas, bautizada por outro diario, The Guardian, como "a mellor do mundo" en 2007. "Pero en realidade nós preferimos esta", apostila o autor do texto.
De Figueiras o xornal destaca que se atopa nun arquipélago dentro do Parque Nacional Illas Atlánticas, que as Cíes están "rigorosamente protexidas e dunha beleza cegadora", e que só dispoñen dun cámping como aloxamento.
Tamén resalta a contorna da praia, a brancura da area e a "auga azul caribeña", e recomenda visitar as illas en setembro ou outubro, ao pasar as vacacións de verán. Así, recomenda tomar un barco da navieira Mar de Ons para chegar ao arquipélago e, unha vez en terra, seguir o camiño á dereita, coa indicación á praia de Figueiras.
Escribe o teu comentario