O BNG mantén o seu rexeitamento á reforma laboral de Yolanda Díaz, á que tamén din 'non' ERC, Bildu e a CUP ​

O Bloque Nacionalista Galego mantense nos seus trece e non apoiará a reforma laboral impulsada polo Ministerio de Traballo e que conta co acordo da patronal e dos sindicatos.

Con todo, os nacionalistas, ademais de Esquerra Republicana (ERC), EH-Bildu e a CUP, ábrense a cambiar de parecer se o Goberno acepta negociar cambios, algo ao que se opón a CEOE.

Néstor Rego con representantes de ERC, Bildu e a CUP | Foto: EP

Esquerra Republicana (ERC), EH-Bildu, a CUP e o BNG escenificaron este xoves no Congreso unha fronte común para reafirmar o seu rexeitamento á reforma laboral en caso de non aceptar o Goberno negociar cambios e melloras no decreto lei acordado coa patronal CEOE e os sindicatos CCOO e UXT.

Nunha declaración conxunta presentada no Congreso, representantes das catro formacións expresaron a súa "absoluta e sincera vontade para abrir un diálogo e negociación co Goberno" e alcanzar un acordo para "unha reforma laboral ambiciosa, que dea resposta ás peticións e expectativas das persoas traballadoras e cumpra coa palabra dada á maioría traballadora".

O ACORDO DOS AXENTES SOCIAIS É INSUFICIENTE

E é que, ao seu xuízo, a reforma laboral que debe someterse a votación a próxima semana no Congreso "non constitúe a derrogación da reforma laboral do 2012" e, aínda valorando medidas incluídas contra a temporalidade e a precariedade, consideran que estas "son totalmente insuficientes para alcanzar o obxectivo de restituír os dereitos laborais básicos arrebatados".

A pesar de sinalar que cada formación é autónoma á hora de decidir o sentido de voto para a convalidación ou derrogación do decreto lei o vindeiro xoves, tanto o portavoz laboral de ERC, Jordi Salvador, como os portavoces de EH-Bildu, Mertxe Aizpurua; a CUP, Mireia Vehí; como o deputado de BNG, Néstor Rego, confirmaron que se o Goberno non se compromete a realizar cambios na reforma, o seu voto será negativo.

Entre as propostas que estas formacións detallaron está a prevalencia dos convenios autonómicos, a recuperación da indemnización de 45 días por despedimento improcedente e os salarios de tramitación, a volta da autorización administrativa para despedimentos colectivos ou a prioridade total dos convenios de sector sobre os de empresa.

ERC RECOÑECE "UN INTENTO" DE DÍAZ POR CHEGAR A UN ACORDO

Salvador criticou que "persoas moi importantes do Goberno", sen citalas, asegurasen "que non se vai a tocar unha coma" do acordo, exercendo "o veto". Un grupo de persoas no que non encadra á vicepresidenta de Traballo, Yolanda Díaz, coa que recoñeceu que "o tacto é diferente" e na que detecta "un intento" por achegar posicións.

"Houbo intercambios, propostas, hai cousas nas que se pode chegar a acordos", recoñeceu, aínda que sinalou que, para mover a súa posición actual do rexeitamento, esas propostas de deberían "acabar de perfilar" e "blindar".