Accidente múltiple na A-6 en Aranga deixa sete feridos, dous deles graves, e o desvío do tráfico

Un camión espallou a súa carga sobre a estrada en sentido Lugo,  provocando o corte dun carril e varias saídas da vía 

Imaxe dun dos turismos danados no accidente en Aranga / CRTVG

Sete persoas resultaron feridas na mañá deste xoves nunha colisión múltiple con catro turismos implicados e un tráiler na autovía A-6 ao seu paso polo termo municipal de Aranga (A Coruña).

Segundo informou o 112 Galicia, foi necesario que os Bombeiros de Betanzos excarcerasen a unha das persoas accidentadas, ao quedar atrapada no interior dun dos vehículos implicados.

Este accidente tivo lugar no punto quilométrico 551 da autovía A-6, sentido a Lugo, ás 6,50 horas, tras o que o tráfico de vehículos quedou interrompido nese lugar, na parroquia de Muniferral, en ambos os sentidos da circulación. Por iso, o tránsito foi desviado á N-VI.

Unha persoa particular alertou da colisión múltiple e indicou na súa chamada, un camión perdera a súa carga na autovía, bagazo de cervexa, o que provocara que os vehículos chocasen entre si.

Por iso, os xestores do CIAE 112 puxeron a situación en coñecemento de Urxencias Sanitarias de Galicia-061, da Garda Civil de Tráfico, dos Bombeiros de Betanzos, do GES de Curtis e do servizo de mantemento da autovía.

Ao lugar do accidente o 061 enviou unha ambulancia de soporte vital avanzado xunto co equipo sanitario do PAC de Betanzos, ademais de catro ambulancias de soporte vital básico.

Tres dos feridos, dous homes e unha muller, foron levados ao Hospital San Rafael, mentres que os outros catro lesionados foron trasladados ao Hospital A Coruña, confirmaron a Europa Press fontes sanitarias.