Pepe Domingo Castaño, lenda da radio, asinará o seu último libro no Corte Inglés da Coruña este xoves

O presentador de Tiempo de Juego e unha das figuras máis importantes da radio nos últimos 50 anos presenta 'Hasta que se me acaben las palabras', o seu último libro.

A firma de libros, nos que o locutor galego repasa a súa traxectoria vital e a súa vida detrás dos micrófonos,  terá lugar o xoves 27 de xaneiro ás 19 horas no Corte Inglés da Coruña.

Pepe Domingo Castaño | Foto: EP

É imposible falar de fútbol, de domingos pola tarde pegados ao transistor, de goles cantados a través dos altofalantes do coche, de Champions, Mundiais e Eurocopas, sen pensar en Pepe Domingo Castaño. O home capaz de vender cervexa, furgonetas, puros, tractores, motoserras ou cemento, todo nunha mesma tarde, e unha das voces máis ilustres da radiodifusión española. Un nome ligado aos seus anos en Carrusel Deportivo na SER e agora en Tiempo de Juego na COPE, cunha traxectoria que lle fixo levantar catro premios ONDAS e innumerables premios e que agora repasa na súa biografía ‘Hasta que se me acaben las palabras’.

Pepe Domingo, de Padrón, é unha lenda viva da radio, un medio que conseguiu cambiar co seu estilo inigualable no medio século que leva pegado aos micrófonos. Desde a súa Galicia natal a Madrid e o mundo enteiro, Pepe Domingo conquistou a música, a televisión e a radio, o medio que o catapultou á eternidade.

A súa vida condensada nun libro recentemente presentado e que trae á Coruña, onde estará a asinar exemplares no Corte Inglés da Rúa Ramón y Cajal o vindeiro xoves 27 de xaneiro ás 19 horas.

“Memoria viva da radio, a través dos seus capítulos coñeceremos non só a súa intrahistoria vital senón tamén as transformacións que viviu este apaixonante medio na súa historia recente”, comentan os organizadores da firma, que describen a súa biografía como un libro “cativador, rico en anécdotas” e que ten a Julio Iglesias como autor do prólogo.

“A vida de Pepe Domingo Castaño é a dun home sinxelo que ten a grandeza de alguén que nunca se creu máis que ninguén, un home que se apoiou nos piares da familia, o amor e a amizade para, sen querelo nin pretendelo, acabar sendo un auténtico referente do noso país. A voz que acompañou a distintas xeracións de radiointes ao longo das últimas décadas”, conclúen.