Pontevedra será sede das Finais do Mundial de Tríatlon en 2023

A cidade do Lérez acollerá a "xoia da coroa do calendario anual" ao recoller a testemuña de Abu Dabi. 

Gómez Noya en 2019 | Foto: EP

Pontevedra acollerá no ano 2023 as Finais do Campionato do Mundo de Tríatlon, a cita onde se coroarán os campións mundiais das categorías Elite, Sub-23 e Paratriatlón, segundo confirmou este xoves a Unión Internacional de Tríatlon (ITU).

O organismo recoñeceu que este evento "é a xoia da coroa do calendario anual" e a cidade galega collerá a substitución de Abu Dabi, escenario elixido en 2022, e únese a cidades como Londres, Budapest, Pequín, Auckland (Nova Zelandia), Chicago (Estados Unidos), Gold Coast (Australia), Lausana (Suíza) e Edmonton (Canadá).

"Estamos encantados de que Pontevedra, que demostrou ser unha anfitrioa fantástica de múltiples deportes no calendario mundial de tríatlon, agora reciba aos mellores triatletas do mundo para as Finais do Campionato Mundial en 2023", celebrou a española Marisol Casada, presidenta da ITU.

Pola súa banda, o presidente da Federación Española (FETRI), José Hidalgo, recalcou que o seu organismo "foi un gran anfitrioa para moitos eventos". "Estamos encantados de dar un paso máis e albergar estas Finais por primeira vez no noso país", afirmou.

Pontevedra xa foi sede en 2019 dos Campionatos do Mundo de Multideporte da ITU, que acolleu as modalidades de Dúatlon, Tríatlon Cros, Acuatlón, Acuabike e Tríatlon Longa Distancia, esta última con vitoria do español Javier Gómez Noya.

"Corrín case todas as Finais Mundiais de Tríatlon nalgunhas das cidades máis incribles do mundo, pero as palabras non poden describir o emocionado que estou de que unha pequena cidade como Pontevedra, onde vivo, estea agora entre as mellores para acoller eventos de tríatlon", subliñou o triatleta galego, cinco veces campión do mundo.