Outro brote escolar, agora no Barco, leva á Xunta a subir as restricións neste municipio e Foz

O venres pasado o municipio do Barco non chegaba a 10 casos activos. Cinco días despois son 31.   A Xunta acaba de confirmar un brote escolar alí, aínda que por agora descoñécese o nome do centro ou centros afectados.

O orixe da alza en Foz tamén é escolar, pois dede o xoves hai un brote no CEIP Cantel. A pesar da cada vez maior evidencia de que as aulas poden ser un motor do covid agora, a Xunta segue sen dar as actualizacións diarias de todos os centros que publicaba o curso pasado. A Xunta por agora só deu datos globais, en rolda de prensa. En concreto, os centros educativos de Galicia rexistran 364 casos activos de Covid e 17 aulas pechadas nos últimos 7 días.

Os brotes en centros educativos levaron ao comité clínico que asesora á Xunta na toma de decisións da pandemia para situar en nivel medio de restricións aos concellos de Foz (Lugo) e O Barco de Valdeorras (Ourense). Pola súa banda, a melloría de Monforte de Lemos coloca, desde o sábado, a este municipio lucense no nivel medio baixo, o máis laxo en medidas de restrición.

A decisión do comité clínico, comunicada en declaracións aos medios este mércores polo conselleiro de Sanidade, Julio García Comesaña, tamén inclúe unha melloría de aforos para todas as actividades en xeral, salvo as que implican quitarse a máscara.

Isto é, todos os eventos, reunións e actos culturais en interiores poderán realizarse sen límite de persoas --máis aló da distancia de 1,5 interpesonal-- e cun aforo máximo do 75 por cento, salvo no nivel máximo de restricións, que será sen límite de persoas pero ao 50 por cento.

"A incidencia acumulada baixa e baixa rapidamente, pero debemos seguir coas normas de prevención", manifestou Comesaña, quen lembrou o uso da máscara, a hixiene de mans e a distancia social como elementos primordiais para a seguridade fronte á covid.

Con todo, a evolución da pandemia, explicou, leva á Xunta a "abrir a man en distintos eixos da vida cotiá". Así, no ámbito da cultura van ampliar as capacidades e as reunións poderán realizarse ao 50 por cento no interior, como se dixo, para o nivel máximo e nun 75 por cento para o resto de casos.

Nas actividades deportivas, os grupos máximos pasarán de seis a dez como máximo, mentres que nos eventos deportivos e espectáculos haberá un máximo de 50 e 75 por cento de aforo, sen límite de persoas, en función do nivel como antes explicouse.

Nos concertos ao aire libre cando sexan de pé, o máximo de persoas será de 5.000 en agrupacións de 500. En cada unha das parcelas desas 500, non poderá superarse o 33 por cento do espazo de cada unha.

Finalmente, segundo informou Comesaña, as agrupacións de persoas nos centros cívicos sociais tamén pasarán de máximo de seis a un límite de dez.

En definitiva, Galicia "queda cunha capacidade xeral do 75 por cento", tendo en conta que non hai ningún concello que se atope no máximo de restricións. Os grupos amplíanse de forma xeral a un máximo de dez persoas, unha semana despois de que se levantaron restricións no ámbito privado.