Quinto galego morto en accidente de tractor en pouco máis dun mes tras un accidente en Forcarei

O campo galego sofre unha verdadeira epidemia de accidentes de vehículos agrícolas.

Un home faleceu na madrugada deste xoves no concello pontevedrés de Forcarei nun accidente co vehículo agrícola que manexaba, que resultou envorcado.

Segundo informou o 112 Galicia, tivo constancia do suceso ás 3,30 horas deste xoves a través dun familiar do falecido que indicou que o home non chegara ao domicilio desde a tarde e que, despois de saír buscalo, o atopara no lugar de Soutelo de Montes nun vehículo agrícola envorcado.

Os operadores do CIAE-112 Galicia puxeron o aviso en coñecemento dos servizos sanitarios, dos Bombeiros do Deza, do GES da Estrada, da Garda Civil e de Protección Civil.

No momento no que o persoal sanitario chegou ao lugar tan só puido certificar o falecemento da vítima, que tivo que ser excarcerada do vehículo pola dotación dos bombeiros, indicaron as mesmas fontes.