Los Secretos regresan a TerraCeo, que confirma máis artistas para esta edición

A segunda edición do festival vigués conta xa con 39 artistas e 33 concertos que se celebrarán a partir do 1 de maio, cando Taburete inaugure o espectaculo.

Ademais det Los Secretos, TerraCeo confirmou datas para Paco Ibáñez, Sho-Hai e R de Rumba ou o humorista Leo Harlem.

Los Secretos | Foto: EP

Faltan apenas dous meses para o verán, pero o inicio da segunda edición do festival TerraCeo o próximo 1 de maio, moitos ven adiantarse a tempada estival en Vigo. O segundo avance do cartel, que conta xa con 33 concertos de 39 artistas, supón o regreso de Los Secretos, en formato de trío acústico, á cidade olívica o próximo 28 de maio despois de inaugurar o festival o pasado ano.

Ademais do grupo madrileño, desde TerraCeo confirman a novos artistas e novas datas para Andrés Suárez e Carlos Sadness, que despois de esgotar as entradas en tempo récord celebrarán un segundo concerto. As incorporacións neste segundo avance van desde o veterano Paco Ibáñez, ata o rapero Sho-Hai acompañado de R de Rumba, pasando por Freedonia, Triángulo de Amor Bizarro, Sinodie, ou o humorista Leo Harlem.

David Rees, Califato 3/4, Anxo Stanich, Beli Basearche, Rulo y La Contrabanda e a parella composta por Grison e Jaime Caravaca tamén visitarán Vigo nesta edición, que garda outras sorpresas cunha especial presenza das voces femininas. “O festival acollerá a presentación de dous discos da escena emerxente da música feminina en Galicia. Trátase dos novos traballos de Dani e do dúo Bala”, comentan desde a organización.

“En TerraCeo participarán tamén este ano Wyyga, Its soul, Sanny, Irene e Mariña, Carolina Rubirosa e Zeltia. Repite, ademais, a cantante de porriñesa Xoana, que tivo unha memorable participación na primeira edición do Festival”, agregan. Nese sentido, sinalan que Os Resentidos e The Soul Jacket tamén forman parte do festival.

A pesar de que aínda quedan coellos na chistera de TerraCeo, desde o festival celebran a “excelenteacollida entre o público” que está a suscitar esta segunda edición, marcada, como non podía ser doutra forma, polas estritas restricións sanitarias. Doutra banda, coa participación de David Rees “TerraCeo ábrese aos espectáculos para toda a familia”. “Do mesmo xeito que aposta pola promoción das novas voces da escena musical emerxente de Vigo e Galicia, o Festival TerraCeo ten vocación de ofrecer opcións para todos os públicos”, conclúe.   

CALENDARIO TERRACEO