Dous coruñeses venderon 1.280 equipos informáticos que non eran seus por case 2 millóns de euros

A primeira prexudicada é unha empresa consultora da Coruña, a nome da cal se compraban os aparellos

Está por ver se os compradores, que non sabían que os vendedores roubaban os dispositivos á súa empresa, teñen que devolver os computadores

A Policía Nacional  detivo na Coruña a dúas persoas por delito de estafa en relación á subtracción de 1.281 equipos informáticos valorados en 1.948.979 euros.

SALTOU A ALARMA NUNHA TENDA DE SEGUNDA MAN
Así o informou a Xefatura Superior de Policía de Galicia, que relatou que a investigación se iniciou a mediados do ano pasado, cando se comprobou que unha persoa vendía gran cantidade de material informático (computadores portátiles e tabletas) dunha coñecida marca, sempre novo, en establecementos de compravenda de artigos de segunda man.

Os axentes pescudaron que o vendedor dos devanditos produtos traballaba nun grupo empresarial do sector tecnolóxico e que actuaba xunto con outro traballador do centro.

UNHA ESTAFA EXECUTADA DURANTE CASE UNHA DÉCADA
A Policía destacou que aproveitaban a súa actividade profesional nese ámbito e a súa posición dentro da empresa para comprar material informático aos provedores, para "logo xustificar as adquisicións mediante a asignación dos mesmos aos diversos proxectos que a súa empresa desenvolvía para as súas empresas clientes". Con todo, ese material non se utilizaba con ese fin, senón que era vendido a terceiras persoas.

"Este sistema de actuación requiría un estudo por parte dos investigados das marxes de beneficio dos proxectos desenvolvidos para as súas empresas clientes, e permitiu durante anos, que os implicados desviasen un gran volume de equipos informáticos", indican as mesmas fontes policiais.

Desde o ano 2012, os investigados supostamente subtraeron 1.281 equipos informáticos valorados en 1.948.979 euros que foron retirados mediante este sistema durante o últimos nove anos, cifra global sensiblemente inferior ao prezo de venda ao público.

MOITAS VÍAS DE DISTRIBUCIÓN
Por todo iso, procedeuse á detención dos dous homes, de 45 e 40 anos de idade, por un delito de estafa. Foron postos ao dispor da autoridade xudicial.

A investigación posterior ha permitido a localización da maior parte dos equipos informáticos, os cales foron vendidos en casas de compravenda de segunda man, na contorna dos detidos, a intermediarios ou a través de empresas de informática e plataformas web de venda de efectos.

Ademais, a Policía apunta que foron distribuídos a través de todo o territorio nacional mediante empresas de mensaxería.