España suspende as vacinas de AstraZeneca a pouco de que Galicia empezase coas vacinacións masivas

Duro golpe para o obxectivo de alcanzar a inmunidade de grupo antes de que acabe o verán, pois o produto británico-sueco era do que máis dose había. O SERGAS empezou a vacinar aos maiores de 55 a finais da semana pasada e agora debe interromper o proceso. 

Consultada a Xunta por Galiciapress, fontes oficiais indican que están a piques de enviar unha comunicación pública respecto diso da suspensión. Hai que lembrar que colectivos como profesores ou policías estaban estes días recibindo a vacina en Galicia, ademais de persoas de entre 50 e 55 anos.

España vai suspender de maneira temporal a administración da vacina contra o coronavirus desenvolta pola compañía AstraZeneca, tras detectarse noutros países varios casos de tromboses en persoas ás que se lle administraron esta vacina, segundo confirmaron a Europa Press.

Vacinación masiva de Astrazéneca en Vigo 

Así se acordou no pleno do Consello Interterritorial do Sistema Nacional de Saúde (CISNS), convocado de maneira urxente este luns pola ministra de Sanidade, Carolina Darias, e no que participaron os conselleiros de Sanidade das comunidades autónomas.

Esta decisión xa foi adoptada por Francia, Alemaña, Iralia, Austria, Dinamarca, Estonia, Lituana, Noruega, Islandia, Tailandia e Irlanda. Ademais, comunidades autónomas como Cataluña, Castela e León, Canarias, Comunidade Valenciana, Asturias e Andalucía suspenderon preventivamente tamén a inoculación desta vacina.

Actualmente, a Axencia Europea do Medicamento (EMA, polas súas siglas en inglés), que se vai a volver reunir este martes, está a estudar os eventos trombóticos notificados, aínda que sinalou que, polo momento, non hai indicios de que a vacinación causase estas afeccións, "que non figuran como efectos secundarios desta vacina".

Do mesmo xeito, o pasado venres a Organización Mundial da Saúde (OMS) seguró que "non hai razón para non usar" a vacina de AstraZeneca contra a COVID-19. "Hai persoas que morren todos os días, polo que é normal que haxa persoas que foron inmunizadas e morren. Os informes dispoñibles ata o de agora non establecen unha relación directa cos trombos xa que esta porcentaxe observouse tamén entre a poboación xeral", dixo a subdirectora xeral da OMS para o Acceso a Medicamentos e Produtos Sanitarios, Mariângela Simão.