​As salas Cinesa de Marineda City reabrirán este venres 19 de marzo tres días á semana

Despois do peche forzoso dos cinemas na comunidade o pasado xaneiro, Cinesa comeza coa reapertura das súas salas comezando polo centro comercial herculino.

Pasaron máis de dous meses desde que o cinema de Marineda City tivo que botar o peche, e esta semana celebrará o regreso do cinema, aínda que só sexa durante tres días á semana.

Cinemas Cinesa | Foto: EP

A melloría epidemiolóxica de Galicia, que regresou a niveis de casos activos non vistos desde agosto, permitiu a reapertura dos cinemas na comunidade.

“Os cinéfilos da Coruña poderán volver gozar do cinema as fins de semana. E é que, polo momento, Cinesa Marineda City abrirá de venres a domingo”, sinala a empresa.

Inmune ou Os Tradutores son algunhas das cintas que figurarán na carteleira de Cinesa este venres. “Cinesa Marineda City reabre con todas as medidas de seguridade implementadas xa en 2020, para garantir as mellores experiencias de cinema, con toda a seguridade para os seus clientes e empregados”, recalcan.

A pesar de todo, e ante “a incerteza do momento”, a compañía recalca que a programación queda “suxeita a calquera cambio de última hora derivado do contexto actual”.