Así son os servizos mínimos na Xunta para a folga feminista convocada para este 8 de marzo
Deberán garantirse as actuacións relativas á violencia de xénero nos xulgados de violencia sobre a muller
Ademais de asegurarse que non se interrupen as vacinacións e os cribados anti-covid, o Goberno garante as actuacións relativas á violencia de xénero nos xulgados de violencia sobre a muller
Foto de arquivo dunha pasada manifestación feminista
O Diario Oficial de Galicia (DOG) publicou este venres unha orde da Consellería de Sanidade e un decreto da Vicepresidencia Primeira e Consellería de Presidencia, Xustiza e Turismo que afectan á asistencia sanitaria e a servizos considerados esenciais, respectivamente, tras abordarse os servizos mínimos no Consello este xoves. Antes de que se fixasen, a CUT xa trasladou o seu desacordo co borrador ao considerar "abusivos" os establecidos para os centros educativos.
Os textos lembraron que "diversas organizacións sindicais presentaron a súa respectiva convocatoria de folga xeral", que afectará a todas as actividades nos sectores público e privado. Así, precisaron que se desenvolverá o día 8 de marzo de 2021, polo que determinaron "o mínimo de actividade necesaria" para asegurar o mantemento de servizos esenciais e de asistencia sanitaria e "o persoal necesario para a súa prestación".
En concreto, a orde da Consellería de Sanidade incidiu en que "o exercicio público da prestación da asistencia sanitaria non se pode ver afectado gravemente polo lexítimo exercicio do dereito de folga" e, en especial, dado o "escenario de crise sanitaria global" que motivou a progresiva adopción "de medidas preventivas, de contención, seguimento e de actuación en materia de saúde pública e asistencia sanitaria" na comunidade.
SERVIZOS MÍNIMOS EN SANIDADE
Ante esta situación, estableceu que deberá garantirse o persoal mínimo necesario para a cobertura do 100% da atención urxente e permanente e as emerxencias do 061, así como para os procesos de vacinación contra a COVID-19 e os cribados realizados para detectar casos positivos.
A Xunta determinou que deberá cubrirse a totalidade da actividade urxente en servizos de urxencias e gardas médicas de centros do Sergas, ademais de en quirófanos para a atención das persoas usuarias que requiran unha intervención cirúrxica inaprazable e salas de partos.
Tamén determinou unha cobertura do 100% da actividade en unidades de reanimación e coidados intensivos e áreas de diálises e tratamentos oncolóxicos, así como en unidades de hospitalización por COVID e en áreas de medicina preventiva, saúde laboral e microbioloxía. Ademais, sinalou que deberá garantirse a prescrición de sangue, medicamentos e produtos sanitarios e a atención necesaria a pacientes subsidiarios de hospitalización a domicilio e coidados paliativos.
Adicionalmente, deberá realizarse o 100% da actividade de limpeza en áreas de urxencias, o laboratorio de urxencias, o radiodiagnóstico de urxencias, a UCI, a área cirúrxica, a reanimación postquirúrxica, a reanimación cardíaca, a oncoloxía radioterápica, hematoloxía, o hospital de día, a zona de diálise e as unidades de hospitalización por COVID.
A cobertura deberá alcanzar o 100% nas unidades de atención urxente prestada a través do 061 e os servizos de transporte para enfermos que requiran tratamentos continuados de oncoloxía, o traslado interhospitalario urxente, as consultas externas urxentes e as probas diagnósticas urxentes.
Nas demais áreas e servizos do ámbito sanitario os servizos mínimos deberán cubrir entre un 25% e un 70% da actividade ou ser similares aos prestados en domingos e festivos.
OUTROS SECTORES
Por outra banda, a Xunta concretou que no ámbito xudicial fixaranse como mínimos os servizos de garda de xulgados, fiscalías e o Instituto de Medicina Legal (Imelga), así como os xuízos orais na orde penal de causas con preso. Tamén terán esta consideración as medidas precautorias ou provisionais en materia de familia, violencia sobre a muller e liberdade provisoria e as actuacións relativas á violencia de xénero nos xulgados de violencia sobre a muller, así como outras relacionadas co Rexistro Civil ou o rexistro de asuntos e documentos nos que venza un prazo.
Nos centros educativos, establécense uns servizos mínimos do 100% para os labores de limpeza e o persoal auxiliar coidador, así como a asistencia do director ou unha persoa do equipo directivo que o substitúa. Nas universidades, os servizos mínimos serán os precisos para permitir a asistencia do alumnado e o persoal que non exerza o seu dereito á folga.
Do mesmo xeito, os centros educativos dependentes da Consellería do Mar con alumnado en réxime de internado deben contar co persoal que manteña a atención aos residentes, a mesma situación que se determinou para os dependentes da Consellería de Política Social.
A Vicepresidencia Primeira tamén sinalou que só se requirirá unha actividade similar á dos domingos e festivos para o Servizo de Prevención e Defensa contra os Incendios Forestais. Tamén deberán acudir ao seu posto os traballadores da Consellería de Emprego e Igualdade que permitan afrontar un sinistro laboral e a súa investigación.
Ademais, deberán garantirse a produción e emisión dos programas informativos da Radio Galega e a Televisión de Galicia considerados "esenciais" e a prestación de servizos públicos en transporte por estrada, así como as vías de pago manual e as condicións de seguridade en infraestruturas viarias.
Escribe o teu comentario