Covid aulas: 40 nenos e mestres e 20 contactos positivos no foco do CEIP Paradai ligado a cepa británica

Había expectación pola publicación da lista de casos activos de covid nas aulas. Nos cinco días que pasaron desde a anterior, apareceron dous brotes escolares probablemente ligados á cepa británica, en Gutiriz e en Paradai, ambos na provincia de Lugo.

Afortunadamente, a nova relación non inclúe outros posibles brotes do mesmo calibre. Si confirma a gravidade dos xa coñecidos.

No conxunto de Galicia, os casos activos caen. De feito, é a maior baixada en todo o curso, aínda que isto débese en gran medida a tantos días seguidos sen clase, cinco, polos entroidos. A curva de casos activos nas aulas séguese asemellando bastante a a curva de infectados na sociedade en xeral.

Os casos de coronavirus nos centros educativos galegos diminuíron case en 750 durante os días non lectivos e sitúanse agora nos 1.783, tras máis dunha semana de continua baixada.

DOUS CENTROS PECHADOS EN LUGO
En concreto, segundo os datos proporcionados pola Xunta, este xoves, primeiro día lectivo da semana tras as vacacións de Entroido, os centros educativos galegos rexistraron 1.783 casos covid entre o seu alumnado e profesorado, 748 menos que os incluídos no último parte, que facía referencia ao venres.

Ademais, permanecen pechadas 78 aulas, 29 menos que o venres pasado e dous centros infantís, a EI municipal de Viveiro, cun positivo, e o PAI municipal de Guitiriz, con 11.

DATOS POR ÁREAS SANITARIAS
Por áreas sanitarias, a que segue rexistrando máis casos é a de A Coruña-Cee, con 557, aínda que tamén é a que experimenta un maior descenso (-171), e ten 14 aulas en corentena. O centro con máis positivos é o CPR Plurilingüe Fogar de Santa Margarida, con 23 casos.

Pola súa banda, a área de Vigo contabiliza 284 positivos (131 menos que o venres) e 22 aulas pechadas; mentres que a de Pontevedra ten 276 casos (-125) e 15 aulas en corentena. O centro vigués con máis casos é o CPR Plurilingüe O Pilar, con 23, mentres que o CPR Santiago Apóstolo de Soutomaior ten 20.

En Santiago quedan 203 casos activos en centros educativos, 120 menos que a pasada semana, e 9 aulas pechadas. O centro con máis casos é o colexio La Salle da capital galega, con 17. Neste centro realizouse un cribado recentemente.

Xa por baixo dos 200 casos sitúase Ferrol, con 119 (-65) e 2 aulas en corentena, con 19 casos no CPR Santiago Apóstolo de Narón; e Ourense, onde os casos baixan en 122, ata os 115, con seis aulas pechadas.

A CEPA BRITÁNICA PODE OBRIGAR A REPENSAR As MEDIDAS

Por encima de 200 casos na comunidade educativa están os centros da área de Lugo, onde diminúen en 14, ata os 229, con 10 aulas en corentena. Nesta zona destaca o CEIP Plurilingüe Lagostelle de Guitiriz, con 32 positivos. 

Ademais, está claro, de o CEIP de Paradai, que ten 40 casos activos entre os seus alumnos e profesores tras facerlle un cribado a todo o colexio. Hai varios factores que apuntan a que este é un brote con transmisión escolar, que se está propagando polas familias. 

En todo o barrio de Paradai hai 60 positivos, segundo a Xunta, polo que os membros da comunidade escolar contaxiados, 40, representan o 66% de todos os diagnosticados. Parte dos outros 20 infectados son familiares dos menores e por agora todas a mostra analizadas son compatibles coa cepa británica. Claro que a cantidade de mostras analizadas é pequena, proba da ínfima capacidade da Xunta para secuenciar o ADN do virus, só 4 análise.

Os primeiros casos no CEIP Paradai de Lugo detectáronse o venres 12, segundo este informe da dirección da escola. A Xunta non informou o público ata o xoves 18, seis días despois, e aínda non fala abertamente de brote con transmisión escolar. O centro segue coas clases e o SERGAS estima que o brote xa está controlado, segundo esta circular na web da escola.

Por tanto, parece que o CEIP Paradai sucedeu algo similar que en Lagostelle, as medidas que foron suficientes para conter outras variantes, pero non o foron contra a cepa británica, máis contaxiosa segundo indicou no seu primeiro anuncio o Goberno do Reino Unido, que, por certo, mantén pechada a maioría das aulas un mes despois. 

Con todos estes datos sobre a mesa, é moi importante observar como evolucionan as cifras escolares dos próximos días. Se aparecen outros brotes escolares tan virulentos como o de Guitiriz e o de Lugo, o normal sería reevaluar o plan de Educación.