Obras nunha rúa de Lugo sacan á luz os restos dunha domus da época romana

Os primeiros restos apareceron na mesma rúa a principios de decembro e agora o xacemento ampliouse. 

O tenente de alcalde do Concello de Lugo, Rubén Arroxo, informou este martes dos novos restos arqueolóxicos localizados no desenvolvemento dos traballos de peonalización da rúa Quiroga Ballesteros.

Segundo os exames preliminares realizados polo equipo de arqueoloxía da obra, trátase dunha continuación da Domus da que se foron atopando restos durante todo o desenvolvemento desta intervención.

INSPECCIÓN ARQUEOLÓXICA
Con todo, este novo fragmento atopado este martes atópase en "mellor estado de conservación que os restos desenterrados anteriormente", explicou Rubén Arroxo, que precisou que, nos próximos días, persoal de arqueoloxía da obra, do Concello e da Xunta de Galicia realizarán un estudo pormenorizado sobre o seu valor histórico.

O descubrimento consiste nun fragmento da entrada dunha das estancias do edificio situado baixo o Centro Social Uxío Novoneyra, e está formado por elementos de pedra e cerámica.