​Fernando Vidal e o resto do consello de administración do Deportivo presentan a súa dimisión

A saída dos dirixentes era só cuestión de tempo despois de que Escotet, presidente de Abanca, entidade dona do club, anunciase cambios a semana pasada.

Galiciapress xa apuntou o xoves que o seguinte paso nos plans do banco era renovar toda a dirección do club. Agora una xunto interina faise cargo de forma momentanea ata marzo, momento no que previsiblemente David Villasuso asuma un novo cargo. 

Fernando Vidal | Foto: RC Deportivo

Aires de cambios chegan ao palco de Riazor. Fernando Vidal, ata o de agora presidente do Deportivo da Coruña, e o resto do consello de administración do club herculino, presentou a súa dimisión. A noticia confirmouse esta tarde pero a súa saída era un secreto a voces, como xa adiantou Galiciapress, despois de que Juan Carlos Escotet, presidente de Abanca, deixase claras as súas intencións de “profesionalizar” o Dépor. A entidade bancaria, máxima accionista e por tanto propietaria do conxunto branquiazul, aposta deste xeito por un modelo máis intervencionista co fin de endereitar o rumbo no plano deportivo.

Os malos resultados do equipo que dirixe Rubén da Barreira (só tres puntos dos últimos 21 posibles e nin un só gol a favor no últimos cinco partidos) propiciaron esta situación. A isto hai que engadir a desastrosa planificación deportiva e un decepcionante mercado de fichaxes en xaneiro, que deixou ao persoal aínda máis debilitada.

As dimisións están condicionadas polo desexo de Escotet de que os actuais membros da xunta abandonen a nave deportivista. “O accionista maioritario comunicounos o seu desexo expreso para que este Consello dea un paso á beira para a entrada de un profesional”, admitiu Vidal na súa comparecencia desta tarde. Vidal, o home con logrou o acordo con Abanca para garantir a supervivencia do club, pecha así a súa segunda etapa no Deportivo, despois de que formase parte do equipo de Tino Fernández durante a súa presidencia.

NOVO CONSELLO EN MARZO

Agora, o organigrama da oficinas da Praza de Pontevedra cambia por completo, aínda que non será ata marzo cando se oficialicen os novos nomeamentos durante a celebración da próxima Xunta de Accionistas. Ata entón, unha xunta interina farase responsable do club. Con todo, é moi posible de David Villasuso, home de confianza de Escotet e única peza que se mantén intacta, siga subindo chanzos e convértase nunha figura importante da próxima dirección.

Doutra banda, nos últimos días unha corrente en redes sociais pide a Escotet que chame a Lendoiro para que tome as rendas do club. Con todo, todo parece que quedará nunha mera anécdota e nun episodio máis de derívaa que tomou este club, un histórico do fútbol español que hoxe vive as súas horas máis baixas.