Covid municipios: A Coruña segue baixando, Ourense está nunha meseta e Pontevedra empeora

O mapa de Galicia segue tinguido de vermello escuro, cor do risco extremo no semáforo de alertas estatal. A inmensa maioría de municipios segue por encima dos 250 positivos por 100.000 habitantes en dúas semanas e non porque os datos non mellorasen estes días. Melloraron significativamente, pero o país vén de niveis tan altos de coronavirus que a chegada do laranxa de risco alto aínda se demorará algunhas semanas.

Por agora, son poquísimos os que se libran de estar en risco extremo. Apenas algúns das comarcas A Mariña Central, A Terra Cha, A Fonsagrada, Os Ancares, os máis montañosos do Carballiño, O Bolo e a  Ribeira Sacra.

A cidade que máis está a mellorar é Santiago. Hoxe o seu cómputo de positivos en dúas semanas é de -15 respecto ao cómputo de onte. Con todo, a incidencia acumulada de Compostela aínda é de 673, moi lonxe aínda do 250 que permitiría baixar ao nivel de risco alto.  Como xa vimos noutras ondas, os niveis do virus baixan máis lentamente do que soben:

A boa noticia é que a incidencia acumulada a dúas semanas é un indicador pouco proclive aos cambios de rumbo. Poida que tarde en baixar, pero se baixa varios días seguidos, é raro que rebote. Polo menos ata que un novo factor cambie o panorama, a extensión da cepa británica , por poñernos pesimistas.

Por tanto, que A Coruña encadee dúas xornadas coa súa incidencia de 14 días baixando é unha excelente noticia.  Con todo, a incidencia na cidade segue sendo brutal, 912 diagnosticados nas últimas dúas semanas. 

A incidencia acumulada a 14 días tamén está a baixar na área sanitaria, non só na cidade. O máis importante agora é se a recente melloría chegará a tempo de evitar, por exemplo, que o SERGAS teña que montar un hospital de campaña en Expocoruña. Está por ver, pois falta unha semana polo menos para que a melloría repercuta nas plantas covid do CHUAC e varias semanas máis para que o alivio chegue a a UCIs, que xa están saturadas.

Polo menos hoxe hai varios concellos da comarca ( A Coruña, Culleredo e Sada) que están entre os que máis ven baixar o seu cómputo:

• Xinzo de Limia -30
• Vigo -25
• Ourense -20
• Coruña (A) -16
• Santiago de Compostela -15
• Ponteareas -13
• Fene -11
• Rois -11
• Viveiro -11
• Culleredo -10
• Ferrol -7
• Padron -7
• Sada -7
• Verin -7
• Salvaterra De Miño -7

A lista de municipios cuxa suma de diagnósticos en dúas semanas máis se incrementa hoxe é:

• Ares +5
• San Sadurniño +5
• Vilalba +5
• Caldas de Reis +5
• Grove Ou +5
• Carballiño (Ou) +6
• Oleiros +7
• Marin +7
• Lugo +8
• Sanxenxo +8
• Vilagarcia De Arousa +9
• Soutomaior +10
• Naron +18
• Pontevedra +22 

É moi destacable que só haxa tres municipios cun salto superior a 10 positivos. Un deles é a cidade de Pontevedra. Agora ben, o empeoramento non é exclusivo na urbe, déixase notar noutros municipios da mesma área sanitaria com Marín, Sanxenxo, O Grove ou Caldas de Reis. De seguir así, Pontevedra pronto pode converterse na terceira cidade de Galicia con peor incidencia acumulada.

O dubidoso de honra de cidade coas peores cifras do país séguelle correspondendo a Ourense. Con todo, a curva ourensá tamén está a dar sinais de estar próxima a un pico. Agora mesmo parece situarse nunha especia de 'meseta' que esperemos sexa previa a un descenso.

A evolución dos positivos en todos os municipios de Galicia pode consultarse no buscador da táboa ao final desta noticia.

EVOLUCIÓN DOS CASOS ACTIVOS POR ÁREAS

A pendente da curva de infectados nas áreas sanitarias galegas non ten nada que ver coa sufrida ata a semana pasda. De feito, en algunhas, como en Ourense, a curva xa presenta unha tendencia claramente á baixa. Á baixa leva xa dous días na Coruña,  que segue soportando unha cantidade enorme de infectados, case 6.000. Pola contra, as curvas de Pontevedra e Vigo aínda tenden á alza, aínda que de maneira moito máis moderada que en xaneiro.

Este martes subiron os casos activos de coronavirus en Galicia ata os 22.522, o que supón 102 máis que a xornada anterior, tras o descenso da xornada anterior. En concreto, baixan en dúas áreas sanitarias: Ourense (2.874) e na da Coruña e Cee (5.883), mentres que soben nas de Vigo (3.861), Santiago e Barbanza (3.442), Pontevedra e O Salnés (2.503), Ferrol (1.824) e Lugo (2.135, o que supón cinco máis).

ÚLTIMOS DATOS POR ÁREAS SANITARIAS

En canto aos contagios diarios detectados por diferentes tipos de probas, aumentaron en 1.001, tras situarse na xornada pasado por baixo do milleiro por primeira vez en varias semanas. Con todo, descenderon os positivos confirmados por PCR nas últimas 24 horas ata os 791, fronte aos 880 da xornada anterior. Ata o momento en Galicia realizáronse 1.434.487 PCR, 11.080 máis con respecto a este luns.

Deste xeito, as persoas contaxiadas en Galicia sitúanse en 99.076, o que supón 1.001 máis que a xornada anterior, delas 22.751 corresponden á área da Coruña; 18.920 á de Vigo; 16.192 á de Santiago e Barbanza; 13.420 á de Ourense; 10.566 á de Pontevedra e O Salnés; 10.415 á de Lugo; e 6.812 á de Ferrol. 

FALECEMENTOS

Os falecidos con Covid-19 en Galicia durante a pandemia aumentaron a 1.815, tras informar nas últimas horas Sanidade de 40 falecementos --correspondentes a varios días--, o que representa a maior cifra comunicada na pandemia nunha xornada.

Esta cifra de 40 falecidos supera os 36 mortos notificados o 1 de abril, na primeira onda, a que ata o de agora supoñía o peor dato comunicado na crise sanitaria --tamén correspondente a varios días--.

Ata a data curáronse de Covid-19 en Galicia un total de 74.752 persoas, o que supón 859 máis que as 73.893 rexistradas ata este luns.