Bugallo constata "un raio de luz" tras o cambio de tendencia do coronavirus en Santiago de Compostela

A incidencia acumulada a 14 días do concello caeu por vez primeira o mércores, seguiu caendo o xoves e repuntou un pouco hoxe. Con todo a curva epidemiolóxica da cidade é moito máis esperanzadora. 

Iso si, os niveis de virus seguen sendo excepcionalmente altos. A incidencia acumulada está en 690, cando a partir de 250 xa empeza o risco extremo no semáforo de alertas estatal.

O alcalde de Santiago, Xosé Sánchez Bugallo, asegurou este venres que os datos de casos activos de covid-19 de "os últimos cinco días" permiten atisbar "un raio de luz" e observar unha "certa consolidación".

"DENTES DE SERRA"

Nunha rolda de prensa, o rexedor recoñeceu que a evolución da covid-19 na cidade é "o tema que máis preocupa" ao consistorio, sobre todo no relativo á ocupación da UCI e aos 737 casos activos desta enfermidade.

Con todo, explicou que, nos últimos días, a cifra de casos activos  bailou  entre os 731 e os 746, a modo de "dentes de serra", o que permite observar "certa consolidación" e é "un pequeno dato optimista".

MESETA ANTES DO DESCENSO?

Así, Sánchez Bugallo indicou que, aínda que nas últimas semanas os casos foron crecendo a un ritmo de entre o catro e o oito por cento, neste últimos cinco días a variación é do 2% e, ademais, con subidas e baixadas.

Aínda que a "cifra é enorme", o alcalde confiou en que estes datos dean lugar a unha "situación de meseta" que desemboque en "o camiño de baixada". Con todo, admitiu que "é posible que a incidencia hospitalaria siga subindo nos próximos días", polo que instou a todos a "ser extraordinariamente prudentes".