Pacientes de COVID-19 esperan “durante horas” con casos non confirmados nas Urxencias do CHUO, denuncia o COEO

O Colexio Oficial de Enfermería de Ourense trasladou á dirección da área sanitaria, encabezada por Félix Rubial, as moitas deficiencias que presentan as urxencias en a EOXI auriense.

Desde a organización fan públicas as queixas do persoal de enfermería do servizo de Urxencias do CHUO, que denuncian a “falta de medios persoais que vén arrastrando desde o final da primeira onda”.

Co fin da primeira onda, sinalan que a xerencia concluíu o reforzo de persoal, tan necesario nestes momentos onde mesmo existe “unha clara falta de espazo físico na zona de Urxencias para atender ao volume de poboación que está a chegar nas últimas semanas”.

Máis preocupante é a orde dada por Francisco Aramburu, xefe de Urxencias, onde indica ao persoal, segundo o relato dos denunciantes, “que os pacientes positivos confirmados de coronavirus esperen durante horas na sala B de Urxencias, xunto con outras persoas que chegan con sintomatoloxía, pero que non son casos confirmados, ou con outras doenzas, ata que se lles pode pasar a boxes”. Unha situación que lembra ao que está a ocorrer no CHUS e que denunciou hai apenas unha semana Galiciapress. 

Isto podería traer consigo novos contagios e desde o Colexio recalcan a necesidade de illar correctamente aos pacientes para garantir a seguridade dos profesionais “para que desempeñen a súa profesión sen a angustia de converterse en vectores de contaxio, poñendo en perigo a súa saúde, a doutros pacientes e compañeiros e a da súa familia”.

PERSOAL "QUEIMADO" E "DESBORDADO"

A continuación, manifestan a necesidade de dotar de máis persoal ao servizo para “reducir o tempo de triaje” e contribuír a aliviar a presión que sofren nestes momentos os profesionais.

Do mesmo xeito, manifestan que aínda que a situación é moi delicada en toda a provincia de Ourense, esta terceira onda chega “sobre un equipo profesional que está esgotado e queimado, que leva un ano traballando en condicións difíciles e con moita incerteza” e que hoxe se atopa “desbordado”, polo que demandan axuda, tanto á xerencia para poñer todas as ferramentas ao seu alcance, como á cidadanía, á que piden “colaboración” e que cumpran de forma estrita as recomendacións sanitarias