A Xunta fixa os servizos mínimos na folga de auxiliares de enfermaría para os días 28 e 29

A Xunta estableceu os servizos mínimos necesarios para garantir a cobertura dos servizos esenciais durante a folga convocada pola Unión Sindical Obreira (USO) e a Federación de Atención á Cidadanía de USO. A folga, de carácter estatal, afectará o persoal técnico en coidados auxiliares de enfermaría (TCAE) entre as 8.00 horas do 28 de novembro e as 8.00 horas do 29 de novembro de 2025.

Tal e como se expón no Diario Oficial de Galicia (#DOG), tanto nos servizos sociais como no Servizo Galego de Saúde (#Sergas), a actividade dos TCAE é "imprescindible" para o coidado básico e continuo das persoas usuarias.
 

A ausencia deste persoal durante a xornada de folga podería xerar "riscos significativos", especialmente en pacientes vulnerables, persoas hospitalizadas, usuarios de centros sociosanitarios e persoas atendidas en urxencias.

Por este motivo, fixouse no ámbito sanitario, unha cobertura do 100% da actividade nos servizos de urxencias, quirófanos urxentes para a atención das persoas usuarias que requiran intervención inaprazable e salas de partos.
 

Con respecto á área de hospitalización establecerase o número necesario para garantir os coidados dos pacientes hospitalizados, en correspondencia cos efectivos dun domingo ou festivo.

Nas consultas, estableceranse servizos mínimos nun dobre ámbito, o apoio á atención de consultas especializadas consideradas como urxentes ou preferentes e atenderanse as consultas inaprazables de pacientes oncolóxicos que requiran tratamento citostático.

Así, nos servizos centrais garantirase a realización das probas complementarias urxentes e aquelas que afecten as persoas hospitalizadas que, ao criterio do persoal facultativo, sexan necesarias e inaprazables, en correspondencia cos efectivos dun domingo ou festivo.

Tamén, garantirase a dispensación de medicamentos, hemoderivados e produtos sanitarios, en correspondencia cos efectivos dun domingo ou festivo. Ademais, nas unidades especiais fíxase o número necesario para garantir o coidado a pacientes en correspondencia cun domingo ou festivo.

SERVIZOS SOCIAIS

Con respecto ao ámbito dos servizos sociais, fixáronse uns servizos mínimos que garantan o funcionamento dos centros, tendo como referencia o número de efectivos presentes nun día festivo.
 

Estes servizos mínimos fixados no ámbito dos servizos sociais considéranse "imprescindibles" para garantir unha atención axeitada ás persoas residentes ou usuarios dos centros, máximo cando é necesario dar unha "resposta inmediata ás diferentes situacións de emerxencia social".

Así, establécese un mínimo dun auxiliar de enfermaría en todas as quendas. A designación dos efectivos será determinada pola dirección respectiva e notificada aos profesionais designados.