Covid Galicia: Máis leves indicios de posible melloría, aínda que as medias de positivos seguen en máximos

Os tenues indicios dun cambio de tendencia percibidos onte gañan hoxe un pouquiño de consitencia. Con todo, son moi fráxiles aínda, polo que non se pode falar dunha pronta melloría, como moito da esperanza de que chegue nas próximas semanas, con sorte. 

A medias semanais e a 15 días de positivos seguen batendo récords, aínda que é certo que a súa subida diaría empeza a frearse. Ademais, por vez primeira en semanas baixa a porcentaxe de cambio diario de casos activos, o indicador que primeiro adoita reflectir modificacións no rumbo do covid-19.  

Así, a media móbil a sete días da porcentaxe de cambio diario de casos activos redúcese de 7% a 6,9%. Aperanta ser unha caída ínfima, e o é. Con todo, o importante é que implica un cambio de tendencia, pois este indicador levaba subindo desde finais de decembro. 

Con todo, a caída é tan recente e tan pequena que é facilmente reversible. Ademais, aínda que finalmente o coronavirus empece a perder terreo, a situación actual xa é gravísima. En só cinco días o SERGAS ten que lidar con 4.000 infectados máis, un ritmo de crecemento que o achega ao colapso dentro dunhas semanas..

Nos indicadores que miden positivos non hai indicios claro de melloría. Os 970 novos positivos é a cuarta peor cifra desde primavera. Con todo, o máximo, 1.135, queda xa catro xornadas atrás. 

Eses 970 contribúen a que a incidencia acumulada semanal rexistre un novo récord, 262 positivos por cada 100.000 galegos. Tamén a incidencia a dúas semanas está en cifras xamais vistas, 431; o que supón multiplicar por 2,5 a que sufriamos en Fin de Ano.

Tras o incompresible parón de PCRs en Nadal, o SERGAS está a pisar en acelerador todo o que pode. Onte completou case 9.900 impulsando a media semanal a 9.887, o seu récord absoluto.

Este esforzo contribúe a reducir a media semanal da taxa de positividade por vez primeira desde o 9 de xaneiro. A caída é mínima, do 10,5% ao 10,3%, pero é outro indicador que dá esperanzas. Por vez primeira en catro días onte deron positivos menos do 10% de PCRs.

CONCLUSIÓNS

Así as cousas, con todos estes números sobre a mesa, pódese inducir

• Xamais houbo tanto coronavirus en Galicia e, desgraciadamente, segue crecidendo. Con todo, onte apareceron os primeiros leves indicios dun cambio de tendencia. Hoxe xorden outros sinais dunha posible melloría a medio prazo. Por exemplo, a caída da media semanal da taxa de positividade e da media de porcentaxe de crecemento diario de casos activos.
• Estes indicadores dun cambio de tendencia son moi recentes, teñen dous días de antigüidade, e moi tenues. Por tanto, son facilmente reversibles. 
• En ningún caso, mesmo se hai moita sorte e Galicia logra dobrar a súa curva de positivos a finais de semana, o SERGAS esquivará unha crise máis grave que a de primavera. Por poñer un exemplo, só en cinco días a área sanitaria da Coruña ten que tratar a 1.000 infectados novos. En toda Galicia, os hospitalizados en planta son xa 664, máis do dobre dos que había en Fin de Ano. Teniendo en cuenta que os hospitalizados seguirán aumentando durante semanas, é probable que a Xunta teña que lidar con máis de 1.000 persoas encamadas, sen contar aos críticos.

ÚLTIMOS DATOS POR ÁREAS SANITARIAS

De todas as áreas sanitarias, a da Coruña é a que máis está a empeorar en termos absolutos. Hoxe achega 242 do total de 890 positivos de Galicia. É tamén a que máis enfermos en UCI ten, 31.

Hai pouco máis dunha semana Lugo non tiña ningún enfermo crítico. Agora xa atende a sete, polo menos dous deles procedentes da área de Ferrol. O SERGAS acaba de abrir alí outra UCI, que normalmente ten parada, porque a pesar dos traslados hai 11 críticos para as 14 UCIs convencionais que adoita haber nesa área. 

Nuns minutos en Galiciapress, máis análises en detalle das cifras a nivel municipal e de área sanitaria.