Coronavirus Galicia: Primeiros fráxiles indicios dun posible cambio de tendencia aínda que segue en máximos

|

As últimas cifras do coronavirus en Galicia non son tan terribles como as da semana pasada. Aínda así, non melloran o suficiente para baixar ningunha das medias semanais ou a 15 días. Por tanto, segue sen haber ningún sinal sólido de melloría, aínda que si se empezan a atisbar indicios, moi débiles e por tanto facilmente reversibles, dun posible cambio de tendencia.


Así, os 890 positivos comunicados hoxe non chegan para rebaixar a incidencia acumulada semanal, que sobe de 243 a 253. Con todo, eses 890 casos confirmados por PCR nas últimas 24 horas é a mellor cifra do últimos catro días.


Ou05Mn incidencia acumulada semanal de coronavirus en galicia  (2)




Hai que ter en conta, iso si, que na súa maioría foron encargados o sábado, día no que se adoita caer a cantidade de PCRs. De feito, caeu; o SERGAS completou uns 8.900 cando habitualmente, de media, vén facendo uns 9.300.





Agora ben, a pesar de realizar menos PCR, a media de positividade non se disparou, de feito o 10% de onte é o mellor rexistro do últimos tres días e está por baixo da media semanal, o 10,5%. 


Son tenues indicios dunha posible melloría a medio prazo da que por agora non hai nin rastro na incidencia acumulada a dúas semanas, o principal indicador e que tende a non cambiar de rumbo facilmente. Hoxe bate un novo récord, poñendo a Galicia en 406 diagnósticos por cada 100.000 galegos en dúas semanas. Xamais Galicia superara a barreira dos 400 de incidencia a dúas semanas. Noutras palabras, xamais houbo tanto covid-19 no país.


EVOLUCIÓN DOS CASOS ACTIVOS


A media da porcentaxe de cambio dos casos activos foi en pasados repuntes a primeira en reflectir cambios de tendencia. Por agora, non hai un sinal claro, pero si algún indicio, pois o seu crecemento moderouse nos últimos días e de feito hoxe queda estancando no 7%.





A isto contribúe o aumento de 5,9% onte, que a pesar de ser unha mala cifra é a mellor da semana. Hipótese sobre a evolución futura ao carón, a situación é gravísima. En só catro días o SERGAS ten que atender a 3.000 infectados máis.  


CONCLUSIÓNS


Con todas estas cifras sobre a mesa, pódese inferir que:




  • Nunca houbo tanto coronavirus en Galicia.  A incidencia acumulada semanal e a dúas semanas están valores récord. A taxa de positividade está en máximos desde a primeira onda, cando se facían poquísimos test.
  • Dado que unha boa parte dos casos activos son moi recentes, o peor para os hospitais está aínda por chegar. Algo moi preocupante, dado que hai UCIs como a de Ferrol que xa tivo que trasladar críticos e outras como a da Coruña por encima do 70% de ocupación. Ou moito mellora a pandemia pronto, ou a situación será máis grave que a de primavera, cando as UCIS aguantaron a duras penas en parte debido a que moitos anciáns de residencias non foron hospitalizados, morrendo centos nos asilos.
  • Hai algún tenue indicio de melloría. Por exemplo, a taxa de positividade baixou hoxe a pesar de realizar menos test o SERGAS e a porcentaxe de crecemento de infectados perdeu empuxe a simple visto. Agora ben, son indicios extremadamente recentes e débiles, procedentes ademais dos datos dunha fin de semana. Por tanto, non hai sinais claros dun cambio de tendencia pronto.




DATOS POR ÁREAS SANITARIAS


A área sanitaria da Coruña volve ser a que máis positivos achega ao total, 242 dos 890. É tamén a que ten máis enfermos en UCI, 31 dos 104 que hai en Galicia.





O dato dos 104 enfermos críticos en extremadamente preocupante. Hai que lembrar que o SERGAS di ter 274 UCIs convencionais. Estamos pois preto do 40% de ocupación sen recorrer a solucións excepcionais. Na primavera chegou haber 178 enfermos críticos. Así as cousas é moi probable que a ocupación neste rebote sexa tan grande ou peor que a da primeira onda.


Máis análise en detalle dos datos a nivel municipal e de área sanitaria nuns minutos en Galiciapress.

 

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress