(VÍDEO) O chamamento de Carlos Núñez a artistas de todo o globo para vir a Galicia no Xacobeo 2021

A poucos días de que se abra de novo a porta santa da Catedral de Santiago, o Goberno de Galicia, á fronte dos festexos do Ano Santo, comeza a ultimar os preparativos para un 2021 que será complicado por mor do coronavirus pero que non impedirá a celebración do Xacobeo.

O músico vigués Carlos Núñez lanzou unha mensaxe esta xornada que terá unha segunda parte nos próximos días.

"Estamos en Galicia gravando con artistas que dunha forma xenerosa están a sumarse de todas as partes do mundo porque este próximo 31 de decembro será a apertura da Porta Santa da Catedral de Santiago", comenta o gaiteiro ao comezo da filmación. 

"Estamos a facer unha chamada a moito talento do mundo para que compartan connosco este reclamo e que a xente se achegue a Galicia", sinalou o artista, sen dar moitos máis detalles sobre o proceso de filmación nin o que está a preparar para este 2021 que entra en apenas dúas semanas. 

O vídeo publicouno o vicepresidente da Xunta de Galicia, Alfonso Rueda, que deixou a porta aberta a "sorpresas" o último día do ano durante a apertura da Porta Santa. 

"Carlos Núñez e algúns amigos queren formar parte do día no que Galicia mirará cara ao mundo e o mundo mirará cara a Galicia", escribiu o político na súa conta de Twitter. Unha enigmática mensaxe que prometeu terá "máis detalles" dentro de "uns días".