A Xunta pecha perimetralmente Galicia a partir de venres e durante toda a ponte de decembro

Mentres os datos evidencian que Galicia está a conseguir dobregar a curva e que goza dunha boa situación epidemiolóxica, a ponte de decembro presentábase ata o de agora como unha ameaza para o rebrote e expansión da enfermidade.

Co fin de anticiparse a iso, o Goberno de Galicia determinou que nestes días festivos Galicia debe confinarse perimetralmente, desde as 00:00 horas do venres 4 ata as 00:00 horas do mércores 9 de decembro, evitando así a entrada de visitantes na comunidade.

A Xunta de Galicia comunicou este mércores ao Goberno central que procederá a pechar perimetralmente o conxunto da comunidade durante a próxima ponte de decembro, para evitar o risco de desprazamentos, especialmente desde e cara a Portugal.

En concreto, a comunidade permanecerá pechada entre as 00.00 horas do próximo venres, 4 de decembro, e as 00,00 horas do mércores, día 9.

A decisión tomouse despois de que os membros do Comité Clínico considerasen "prioritario" protexer a mobilidade desde e cara a Portugal, dada a elevada incidencia de coronavirus que presenta esta área.

Aínda que inicialmente barallouse a posibilidade de reclamar ao Goberno central, a través de Exteriores, o peche desta fronteira, finalmente, considerouse que non procede "facelo por partes".

Deste xeito, Galicia toma a decisión de permanecer pechada durante esas xornadas, o que tamén evitaría entradas e saídas desde outros puntos de España. Aínda que a maioría das comunidades xa trasladaron a súa intención de pecharse perimetralmente eses días, hai algunhas que aínda non manifestaron a súa opción.

Durante a rolda de prensa celebrada esta mañá para dar conta das novidades do plan de desescalada proposto por Executivo galego en consonancia coas recomendacións do comité clínico, o presidente da Xunta, Alberto Núñez Feijóo, advertiu dos riscos de empeorar a situación epidemiolóxica se se incrementa a mobilidade durante eses días. "Imos mandar unha mensaxe moi clara aos galegos", dixo o xefe do Executivo galego, que os instou a "non viaxar na ponte".