Vigo adianta a este mércores o aceso das súas luces de Nadal nun acto co aforo restrinxido

A pesar de que o plan inicial era celebrar o acto do aceso este xoves, o concello vigués decidiu adiantar "a chegada do Nadal" ao día 1 de decembro. 

Ademais, este acto, marcado pola pandemia, contará cun aforo reducido. "Dígolle á cidade que non veñan presenciar o aceso; que o sigan polos medios", pide Caballero aos veciños. 

O Concello de Vigo decidiu adiantar o aceso da súa iluminación de Nadal para este mércores, ás 20,00 horas, ante a perspectiva de que o xoves (data fixada inicialmente) poida chover a esa hora, e dará o pistoletazo de saída á campaña do Nadal cun acto restrinxido, no que só haberá 50 invitados.

Así o confirmou en rolda de prensa o alcalde, Abel Caballero, quen explicou que, para o acto de aceso, pecharase a rúa Policarpo Sanz. Así mesmo, participarán uns 50 representantes de asociacións culturais, veciñais e sociais, gardando a distancia social, no marco das medidas para evitar a expansión da pandemia de COVID.

O rexedor, quen subliñou que "o Nadal arrinca con Vigo" para "todo o planeta Terra", fixo un chamamento aos cidadáns: "Dígolle á cidade que non veñan presenciar o aceso. A rúa Policarpo Sanz estará pechada (...), que o sigan polos medios de comunicación, que haberá tempo de vir e velo, e haberá luces en todas partes".

Caballero asegurou que a cidade volverá ter unha "magnífica iluminación", aínda que sinalou que a campaña do Nadal non será como a do ano pasado, no que chegaron a pasar xunto ao gran abeto de luces "catro millóns de persoas, contabilizadas polos teléfonos móbiles dos maiores de 18 anos".