Primeira pedra das obras do Orbital de Santiago, "un antes e un despois no desenvolvemento" da capital

O alcalde Xosé Sánchez Bugallo, o delegado do Goberno Javier Losada e a subdelegada do Goberno na Coruña Pilar López-Rioboo estiveron presentes no acto. 

A ligazón conectará a A-54 coa AP-9 e promete ser unha "peza fundamental do quebracabezas da Rede de Estradas do Estado en Galicia" co proposito de desconxestionar as entradas á capital galega e aos polígonos empresariais periféricos.

O delegado do Goberno en Galicia, Javier Losada, inaugurou este mércores, xunto ao alcalde de Santiago de Compostela, Xosé Sánchez Bugallo, e a subdelegada do Goberno na Coruña, Pilar López-Rioboo, as obras do Orbital, unha ligazón que unirá a estrada A-54 coa autovía AP-9 e que supoñerá "un antes e un despois no desenvolvemento" da capital galega.

O novo tramo aliviará o tráfico cara a Santiago norte, canalizará a entrada e saída aos polígonos empresariais como o da Sionlla, Tambre ou Costa Vella e habilitará un acceso directo e gratuíto desde a autoestrada ao aeroporto de Lavacolla, que actualmente se fai por estrada secundaria.

No acto de inauguración, o alcalde de Santiago recalcou que o Orbital non só será "un paso máis" para a capital galega, senón que mellorará "notablemente" as comunicacións de toda Galicia, xa que "norte e sur conflúen en Santiago".

Nesta mesma liña, Javier Losada subliñou que a Ligazón Orbital de Compostela será unha "peza fundamental do quebracabezas da Rede de Estradas do Estado en Galicia". A execución do esta nova vía supoñerá, en palabras do delegado do Goberno, "un antes e un despois no desenvolvemento económico e urbano" da capital de Galicia. Engadiu ademais que, co Orbital, a área metropolitana gañará en seguridade viaria.

Para o delegado do Goberno, o Orbital é un resultado máis do compromiso persoal do alcalde Bugallo e do adquirido polo Ministerio de Transportes, Movilidad e Axenda Urbana, que inviste neste proxecto 22,5 millóns de euros.

Losada subliñou que ese compromiso mantense para o ano 2021 e que o seu reflexo será visible no investimento comprometido en estradas de Galicia nos orzamentos xerais do Estado para o próximo ano. "Destinaranse 256 millóns de euros, un 35% máis que nos anteriores orzamentos, 67 millóns máis para as estradas galegas", apuntou o delegado.

Javier Losada lembrou tamén que nestas contas cobrará "especial relevancia" a autovía A-54, que conecta Santiago con Lugo e para cuxa finalización se destinarán 69 millóns de euros.

O ORBITALIÑO, EN FASE DE ESTUDO

O Orbital, dun quilómetro de lonxitude, executarase cunha glorieta superior con catro ramais diferenciados. O vial terá unha plataforma con calzadas separadas, cada unha con dous carrís por sentido. O prazo de execución estímase en 30 meses.

Esta actuación completarase cando se execute o Orbitaliño, unha ligazón que facilitará o acceso ao polígono da Sionlla e que, como indicou o delegado do Goberno en Galicia, atópase actualmente en estudo das alegacións presentadas na fase de información pública ambiental.