Alcoa alega que o ERE é "necesario" e recorre o fallo do TSXG que lle impide parar as cubas

A compañía estadounidense mantén que a planta de Cervo é "pouco competitiva" e promete dar batalla de novo nos tribunais.

En pouco máis de dous anos e medio, e sempre segundo as contas que achegan desde a compañía, a planta perdeu 151 millóns de euros. 

Alcoa interpuxo este mércores un recurso de apelación contra o fallo do Tribunal Superior de Xustiza de Galicia (TSXG) que lle impide parar as cubas de electrolisis na planta de San Cibrao, en Cervo (Lugo).

Segundo informan fontes da empresa a Europa Press, Alcoa cre que a resolución dos maxistrados que aceptou en parte as medidas cautelares pedidas polos representantes dos traballadores "incumpre algunhas normas procesuais".

A xuízo da compañía, que pretende executar un despedimento colectivo para 524 empregados da factoría de aluminio que se negou a vender a Liberty e á SEPI, "a medida cautelar non cumpre cos requisitos legais", de aí o recurso de apelación interposto ante o TSXG.

En paralelo con este proceso, as fontes de Alcoa avanzan que a firma "defenderá a súa posición de que o despedimento colectivo é necesario" noutro proceso iniciado polo comité de empresa, que impugnou o pasado venres esa decisión da empresa que afecta a máis de medio milleiro de empregados.

Segundo Alcoa, é "necesario debido aos factores estruturais permanentes que impactan na planta de aluminio de San Cibrao, que a fixeron pouco competitiva". Ademais, asegura actuar "de boa fe e de conformidade coa normativa aplicable sobre procesos de despedimento colectivo".

PERDAS

Por último, as fontes de Alcoa aseguran que a planta perdeu 151 millóns de euros entre xaneiro de 2018 e o 30 de setembro de 2020.

Precisamente este luns, o comité de empresa ofreceu á compañía "paz social" se senta a negociar a venda e levanta o despedimento colectivo, de modo que se alivien as perdas que está a supoñer o bloqueo da saída de material da factoría no marco da folga indefinida que mantén o persoal desde hai semanas.