Brote de coronavirus en Chantada con catro casos mentres o de Meira segue estable

Desde o SERGAS insisten en que hai que ter moito coidado nas reunións familiares, que parecen estar detrás dos focos das dúas vilas. Con todo, a área sanitaria de Lugo é das que mellores datos ten nas últimas semanas.

O brote de coronavirus Covid-19 rexistrado no municipio lucense de Meira mantense en 18 positivos e outro detectado en Chantada presenta catro casos, confirmaron este xoves a Europa Press fontes da área sanitaria de Lugo.

Centro de saúde de Chantada nunha imaxe de Google Street View

En relación ao brote en Meira, de orixe familiar, fixéronse probas aos contactos no marco do rastrexo realizado e, ata o momento, as PCR dos contactos destes positivos saíron negativas.

En canto ao brote detectado no municipio lucense de Chantada, tamén de orixe familiar, confirmaron as mesmas fontes sanitarias, mantense en catro positivos.

CINCO PERSOAS NA UCI

A área sanitaria de Lugo rexistra, segundo os últimos datos actualizados o mércores, 486 casos activos, dos cales cinco corresponden a pacientes ingresados en UCI, no HULA e 26 noutras unidades de hospitalización, mentres 455 están en seguimento no seu domicilio.

Ata a data na provincia de Lugo faleceron 91 persoas con Covid e curáronse 2.689

. Os casos totais de coronavirus nesta área sanitaria ascenden a 3.266. Por tanto, faleceron un 2,7% dos diagnosticados, pero a taxa de letalidade real poida que sexa bastante menor debido á abundancia de casos asintomáticos non detectados, sobre todo na primeira onda.