As "calumnias do PP" escóndense detrás da investigación pola súa suposta prevaricación, di a alcaldesa do Porriño

Eva García de la Torre, alcaldesa do Porriño, compareceu esta mañá ante o xuíz como investigada por un presunto delito de prevaricación administrativa.

A rexedora do municipio pontevedrés mostrouse aberta a colaborar coa Xustiza e pon o foco sobre o Partido Popular, que a denuncia para tapar que os populares "non teñen un proxecto político para O Porriño".

A alcaldesa do Porriño (Pontevedra), a socialista Eva García de la Torre, mostrouse disposta "a colaborar plenamente coa Xustiza" na causa na que figura como investigada por suposta prevaricación administrativa e que achacou a "calumnias" do Partido Popular.

En declaracións remitidas aos medios antes de comparecer este luns no xulgado de instrución número 2 do Porriño en calidade de investigada, a rexedora comprometeuse a "defender o que é verdade" e a súa xestión, sobre a que afirmou que "en absoluto foi contra a legalidade".

Do mesmo xeito, García de la Torre afirmou que deixará "en evidencia ao PP", ao que acusou de levala ao xulgado "con calumnias" debido a que se trata dunha formación que "non ten un proxecto político para O Porriño e para dar resposta a problemas concretos dos cidadáns".

No marco do procedemento tamén se investiga ao que fose edil de Vías e Obras, Manuel Carrera (do partido UDDL e antes no PP), un exconcejal socialista de Limpeza, Orlando Márquez, varios empresarios e dúas asesorías.

A investigación remóntase a varios anos atrás e, de feito, abríronse varios procedementos por diversas denuncias, entre elas algunhas do PP. As causas foron unificadas e investíganse supostas irregularidades na adxudicación de contratos para servizos como limpeza viaria, rozas e xardinería, así como outros posibles delitos relacionados coa emisión de facturas por servizos ao Concello.
 

Así, a Fiscalía iniciou dilixencias de investigación por suposta contratación irregular de servizos de roza e limpeza viaria entre 2016 e 2017, e interpuxo denuncia, pero a investigación ampliouse ao exercicio 2018. Nese sentido, analízanse tamén outros posibles delitos, como a falsidade documental ou tráfico de influencias (un dos investigados figurou nas listas do partido UDDL, e tamén se investiga á súa muller, o seu irmán e a súa sobriña).