Datos coronavirus Galicia: A Coruña cae por baixo do milleiro de casos activos, descenso en Pontevedra e só soben Ourense e Vigo

Os datos do Servizo Galego de Saúde reflicten esta xornada uns datos moi positivos no referido á evolución dos casos en Galicia.

O conxunto das áreas galegas ofrecen un descenso próximo ao centenar de casos activos en só 24 horas e só dúas áreas arroxan datos de subida: Vigo e Ourense.

Nese sentido, os datos á alza da área olívica e da área auriense apenas teñen relevancia esta xornada: seis novos casos na primeira; unha quincena de novos casos na segunda. Con todo, a situación en Ourense si preocupa e moito ás autoridades sanitarias, xa que na última semana a área sumou 202 casos novos aos seus índices. 

Estes datos poderían motivar novas restricións na provincia ourensá, onde Verín e a capital son algúns dos municipios onde a incidencia da enfermidade levou ás autoridades santiarias a aplicar medidas.

ÁREAS EN DESCENSO

Unhas medidas que, despois dos datos desta xornada, poderían aliviarse noutras zonas de Galicia onde o número de casos descendeu de forma notable. Esta xornada A Coruña cae por baixo do milleiro de casos activos, con 999 casos concretamente (47 casos menos en 24 horas). A área herculina, que nesta segunda onda estivo preto do milleiro e medio de casos activos, non contaba con tan poucos casos activos desde o 19 de agosto, momento no que eran 960 os afectados na área coruñesa.

Coa Coruña a área que hoxe perde máis casos activos é Lugo. A área lucense, despois de rebaixar onte as súas cifras en 53 casos menos, ofrece hoxe unha baixada de 37 casos menos. Tamén Santiago de Compostela, cunha rebaixa de 15 casos activos, ve minguar as súas cifras. Vigo, sen cambios nos seus datos, e Ferrol, cun caso menos desde onte, pechan os datos desta xornada. 

Estes datos tiveron un impacto inmediato sobre a tendencia galega, que aínda que de momento aínda arroxa valores de subida, vaise achegando aos poucos a porcentaxes negativas. Se o pasado xoves Galicia evolucionaba a un ritmo do 0,5% cando todo parecía indicar que pronto entraría nunha evolución negativa, hoxe esa evolución da media semanal é do 0,2%, un 0,1% menos que onte despois de catro xornadas seguidas en descenso. 

Segundo os datos de as notas de prensa de o SERGAS, este luns 28 de setembro o número de casos activos de coronavirus en Galicia é de 4.353, dos cales 999 son da área da Coruña, 552 de Lugo, 743 de Ourense, 811 de Pontevedra, 512 da área de Vigo, 583 de Santiago e 153 de Ferrol.