El Corte Inglés tenta colocar 600 millóns de débeda tras perder 500 millóns en só tres meses

El Corte Inglés (ECI), cuxas arcas viñan xa moi minguadas antes do coronavirus, perdeu máis de 500 millóns en marzo, abril e maio. Para saír da lameira, o grupo vai procurar endosar 600 millóns máis de débeda mediante bonos. Non o terá fácil, pois todas as grandes axencias de rating manteñen a súa débeda a un banzo do bono lixo.

Fontes da compañía  confirmaron hoxe o lanzamento dos bonos. "A resiliencia e fortaleza do negocio de El Corte Inglés nunha situación de enorme incerteza, animou á empresa para sondar o mercado para unha posible emisión de bonos nos próximos días", declararon a Europa Press.

Neses 500 millóns de perdas inclúense máis de 300 en provisións. A facturación das vendas afundiuse case á metade nese trimestre, a pesar do repunte das compras de alimentos. 

FACENDO CAIXA COMO SEXA

Con todo, a sociedade que preside Marta Álvarez insiste en que a situación da compañía é "sólida". O certo é que hai tempo que ECI anda curto de liquidez e tivo que recorrer ao Estado como avalista. De feito, ademais de vender varias filiais e centros comerciais, ten en venda preto de 100 inmobles en toda España, incluído o local en Marineda City da Coruña e outros dous en Barcelona.

Superado o confinamento, a compañía di que deixou atrás os números vermellos, con un ebitda positivo no trimestre de xuño, xullo e agosto. 

PENDENTES DO COVID

Como todo os comercios, a saúde financeira da cadea depende en gran medida da evolución dos rebrotes e a confianza do consumidor.

Así o demostra os datos de vendas do comercio polo miúdo  no verán. Cando o coronavirus estaba máis siliente, en xuño, as vendas foron só un 8% menores ás de xuño de 2019. En canto o virus empezou a rebotar, a facturación volveu decrecer, chegando a ser un 14% menos que a de 2019 en agosto.