25 de 27 edís dimisión do alcalde de Ourense pero por agora non hai pacto para botar a Jácome

O Bloque témese un pacto entre o PSOE, PP e Cidadáns. O PP ábrese a un "goberno de coalición" e asegura, a pesar da evidente traizón ao líder de Democracia Ourensa, que sempre foi leal con Jácome . "Ourense impórtalles un bledo", responde o localista aos conservadores.

O pleno do Concello de Ourense, co apoio de todos os edís que conforman a Corporación salvo 2 (o propio alcalde, Gonzalo Pérez Jácome, e o único concelleiro que lle é leal, Armando Ojea), sacaron adiante unha moción na que se reclama a "dimisión inmediata" do rexedor, quen se mantén en que é vítima de "unha traizón" e en que "non ten que ensinar as contas" do seu partido, Democracia Ourensá.

O ex-acalde e líder do PP Jesús Vázquez hoxe no pleno

JÁCOME TIRA DE RETRANCA
Ao termo da votación da moción, que apoiaron PP, PSOE, BNG, Cs e os edís de D.O  críticos con Jácome, o propio alcalde chanceou con que "menos mal que non é vinculante" ou non podería seguir coa orde do día da sesión plenaria.

Previamente, foi obxecto de duras críticas dos portavoces de todos os grupos municipais no debate. El defendeuse, cargou contra os "traidores" do seu propio grupo e contra o PP, á vez que apelou á presunción de inocencia, e esgrimiu que non ten que ensinar as contas de Democracia Ourensá.

"Nin ao PP, nin ao BNG, nin á cidadanía", sentenciou, antes de subliñar que o que está a debate --tras a denuncia dos críticos en Fiscalía-- non son as contas do Concello (nas que asegurou que é preciso a transparencia total cos veciños da cidade), senón as do seu partido. "Pero as contas de D.Ou. son cousa do Tribunal de Contas e D.Ou.", esgrimiu.

"É o colmo. O PP, o da Gürtel, un partido corrupto condenado por un xulgade quere que lle ensine as contas. Pero seica o PP é un xuíz?", preguntou e lembrou aos populares que se pecharon na defensa de Manuel Baltar cando unha muller denuncioulle "por forzar relacións sexuais a cambio de traballo" sen esixirlle que "demostrase que non o fixo".

"É O COLMO QUE CHE DIGAN 'DEMOSTRA QUE NON VIOLACHES'"
"É o colmo que che digan 'demostra que non violaches a alguén'", insistiu, nunha tensa sesión na que Jácome acusou o líder dos críticos, Miguel Caride, de promover un "boicot" para que non se acudise ao pleno e, ante a falta de quórum, tratar de evitar a substitución do edil crítico que presentou a súa renuncia por Telmo Ucha.

O rexedor tamén subliñou cando os críticos e os populares votaron xuntos nunha das mocións (sobre a volta ás aulas) que se debateu na sesión. 

"Os catro díscolos de DO romperon a disciplina de voto, e están a aliñar os seus votos co PP na sesión plenaria. Xa é oficial. Tránsfugas que rouban a vontade das urnas: Miguel Caride, Manolo Fórum, María Debuxa e Maite Rdez", escribiu no seu perfil de 'Twitter'.

Máis tarde, nunha moción na que populares e críticos votaron en sentido distinto, apuntou que era "cousa rara". Así mesmo, nun punto do pleno fixo un inciso para subliñar como se incrementou a "expectación" ante o pleno municipal na canle de Youtube do Concello, ao pasar "de 50 a 250 espectadores".