​Feijóo afirma que facer rotacións no persoal das residencias “non é bo” e Eventuais en Loita responde: “Non é o que din as súas políticas”

O colectivo ‘Enfermeiras Eventuais en Loita’ replica as afirmacións do presidente da Xunta e candidato do PPdeG para a reelección, Alberto Núñez Feijóo, que onte dixo que “non é boa unha alta rotación no persoal que coida aos maiores porque supón riscos sanitarios adicionais”.

A plataforma carga contra o líder dos populares galegos e bota man do historial das políticas aplicadas neste ámbito durante os 11 anos de Feijóo á fronte da Xunta de Galicia. Neste sentido, desde a organización poñen de manifesto que o persoal eventual “máis máis do 40%, estivo e está concatenando contratos de días, en diferentes servizos e cunha rotación elevadísima”.

Enfermeiras Eventuais en Loita responden as políticas sanitarias de Feijóo

“Onde dixen digo, digo Diego”, ironizan desde Enfermeiras Eventuais en Loita, xa que estas políticas de contratación o que provocan é “aínda maiores riscos sanitarios”.

“Non podemos deixar en o  esquezo os riscos aos que estiveron expostos, tanto o persoal do SERGAS como os enfermos, durante o momento máis agudo da epidemia da Covid-19. Debido á eventualidade extrema, o persoal tivo que facer rotacións nas que ofertaban contratos de días soltos en Unidades de Hospitalización con casos positivos de coronavirus, para logo continuar noutras onde se atopaban pacientes susceptibles a infeccións como inmunodeprimidos ou mesmo neonatos”, expón a plataforma.

A continuación, argumentan que a sanidade galega demostrou “unha debilidade enorme” e que esta é unha evidencia que non poden negar “nin sequera os xestores sanitarios”. “Esa debilidade, en parte, vén explicada polas políticas de  redución e a elevada rotación e precariedade do persoal”, lamentan.

A MESMA SENDA E "MENTIRAS"

Estas carencias foron postas sobre a mesa o pasado sábado en Santiago de Compostela durante a manifestación do persoal sanitario que percorreu as rúas da capital galega. A pesar das protestas, desde Eventuais en Loita denuncian que o propio Vázquez Almuiña, conselleiro de Sanidade, manifestou que a intención do Partido Popular en caso de ser reelixido é seguir pola mesma liña a pesar das moitas voces críticas contra a súa xestión.

“É dicir, continuar apostando polo persoal eventual como man de obra barata e precaria”, critican desde a organización, á vez que advirten que a Xunta e o SERGAS reclaman ás residencias privadas “o que eles non son capaces de facer: nin dar estabilidade nin diminuír a rotación”.

“Ese é o camiño das políticas de contratación do actual goberno da Xunta de Galicia. Mentiras e mentiras. O certo é que nin se fan ofertas públicas de emprego todos os anos, nin existe ese plan de estabilidade que pretendeu vender aos que non coñecen a verdadeira realidade”, conclúen desde a plataforma.