Baltar poderá escoller os tribunais da oposicións grazas a Jácome

Ata o de agora elixíanse por sorteo entre os funcionarios. Democracia Ourensana, outrora suposto adaíl da loita contra o caciquismo, apoia o cambio de normas promovido polo PPdeG

O presidente da Deputación de Ourense, José Manuel Baltar Blanco, volverá designar directamente aos membros dos tribunais de selección de persoal funcionario interino e laboral temporal ao servizo do ente provincial.

Jacome e Baltar o día no que consumaron a súa sorprendente alianza 

JÁCOME APOIA A BALTAR NESTE CAMBIO

A modificación da ordenanza foi aprobada este venres no pleno provincial correspondente ao mes de maio, cos votos en contra dos grupos da oposición que auguraron "unha volta ao sistema de nomeamento a dedo" e criticaron con dureza "a falta de transparencia nas políticas de emprego do ente provincial".

Pola súa banda, o executivo en coalición de Partido Popular e Democracia Ourensá argumentou que a vía do sorteo para nomear aos membros dos tribunais de selección "non resultaba operativa nin áxil" debido a "a dificultade de atopar membros para a composición dos mesmos" e incidiron en que esta modificación da ordenanza "entra dentro do marco legal".

CRÍTICAS DESDE AS BANCADAS DA OPOSICIÓN
Ante esta situación, a deputada provincial de Cidadáns, Montserrat Lama, emprazou ao Goberno provincial a "buscar alternativas" e "cuestionarse por que rexeitan os empregados participar nestes procesos selectivos".

Ademais, o PSOE mostrou a súa sorpresa por que "non se admitise ningunha das propostas formuladas polas organizacións sindicais no proceso de negociación colectiva previa".

Na mesma liña foron as críticas do portavoz do BNG, Bernardo Varela, que lles lembrou que "os sindicatos se desmarcaron porque se fixo caso omiso á súa proposta na que se pedía que as listas se fixesen por acordo da parte sindical e patronal, e que puidesen acceder a elas persoal doutras administracións públicas interesados en participar".

"BLINDAR O AFORRO DA ADMINISTRACIÓN LOCAL"
Por outra banda, o PP presentou unha moción para "instar o Goberno de España a garantir a autonomía das entidades locais para a xestión dos seus recursos".

O portavoz do grupo Popular, Plácido Álvarez, baseouse na Constitución para defender esta moción que, nun primeiro momento, tamén era presentada por DO e da que finalmente se desvincularon na comisión por "razóns meramente formalistas, referidas ao número de mocións que se poden levar a pleno por grupo".

Con todo, o portavoz de DO, Miguel Caride, mostrou en todo momento o seu "convencemento de que desde as administracións locais e provinciais débese actuar para protexer o seu aforro". "Hai que blindar o aforro da administración local e nese aspecto debemos remar todos xuntos", engadiu.

"O Goberno de Pedro Sánchez quere aproveitar o estado de alarma para coar pola porta de atrás calquera truque legal que lle permita apropiarse dos recursos das entidades locais que forman parte do Estado", manifestou Plácido Álvarez.

No tocante a esta moción, todos os grupos políticos mostraron o seu apoio, excepto o PSOE que acusou ao grupo de goberno de "emitir xuízos de valor de algo que non pasou" ao presentar unha moción "baseada en bulos e rumorología".

O BNG votou a favor, pero quixo poñer en cuestión "en boa medida a parte expositiva" sobre a que o seu portavoz, Bernardo Varela, dixo "non compartir". Con todo, xustificou o sentido do seu voto en "a cuestión de fondo" e "por responsabilidade" á hora de defender a autonomía municipal.

Agora ben, Bernardo Varela foi máis aló, na liña da moción tamén presentada polo seu grupo referente a un Plan provincial único de cooperación cos concello da Deputación de Ourense, para solicitar a "derrogación da Lei de Estabilidade Orzamentaria e Sustentabilidade Financeira" e que o remanente de tesourería do que dispón a Deputación de Ourense, de aproximadamente 30 millóns de euros, "sexa empregado con criterios obxectivos e non en beneficio duns poucos".

De maneira conxunta a esta acordouse debater a moción presentada polo grupo provincial de Cidadáns mediante a que insta o goberno de España a que os concellos e deputacións poidan dispoñer do 100% dos remanentes de tesourería obtidos polas entidades, flexibilizando a regra de gasto para todas as entidades locais e provinciais con superávit.

A moción foi apoiada por todos os grupos, aínda que o deputado do PSOE, Ignacio Gómez, lembrou que "nunca se di a verdade de que o goberno de España xa autorizou a gastar o 20% dese remanente para facer fronte á crise do Coronavirus".

Precisamente en memoria das vítimas do Covid-19, a sesión ordinaria do Pleno da corporación provincial de Ourense comezou cun minuto de silencio ao que se sumaron todos os representantes políticos.