Alcoa confirma o peche parcial da súa planta de San Cibrao coa destrución de 534 empregos na produción de aluminio

As perdas que viña arrastrando a empresa na fabricación de aluminio na factoría lucense foron determinantes para que se constate o despedimento da metade do persoal da planta, como anunciou Galiciapress a última hora de onte.

A decisión, doutra banda, non afectará á produción de alúmina, o outro material que se traballa na planta lucense. Ademais, aínda que o máis de medio milleiro de despedimentos supoñen un golpe case mortal á produción de aluminio na factoría, a operatividade da planta de aluminio manterase aínda que a unha escala moito menor. 

Alcoa comunicou este xoves que abre un período informal de consultas por o despedimento colectivo de 534 empregados da súa planta de aluminio primario de San Cibrao, no municipio de Cervo (Lugo), debido á súa produción "ineficiente".

Segundo explica a compañía nun comunicado, os problemas "estruturais" de altos custos de enerxía e o baixo prezo do aluminio, xunto co exceso de capacidade global, "causaron significativas perdas recorrentes, que se prevé que continúen".

O complexo industrial de San Cibrao está composto por unha planta de aluminio e unha planta de alúmina, que empregan a 633 e 510 persoas respectivamente. A reestruturación prevista na planta de aluminio prevé operar "só unha parte da fundición". Con todo, asegura que a produción da planta de alúmina "non se verá afectada por este período informal de consultas".

Agora, Alcoa inicia un período informal de consultas cos representantes dos traballadores de San Cibrao ante a situación "insostible" da planta de aluminio.