A Xunta "nega" protección ao persoal de residencias tras atender durante sete días a maiores con coronavirus, denuncia CC.OO.

O sindicato denuncia que mentres ao Policía Nacional reparte máscaras de forma masiva, aqueles que se atopan en primeira liña de lume contra o coronavirus non conten co material protector "que permita garantir a súa propia protección nin a da súa familia".

Comisións Obreiras denuncia que a Xunta "negue material de protección esencial" ao persoal traballador das residencias integradas de Baños de Molgas (Ourense) e Santiago á hora de regresar aos seus domicilios despois de traballar "cos residentes" que sofren COVID-19 "durante sete días consecutivos".

O sindicato tachou de "irresponsable e temeraria" a "decisión" da Consellería de Política Social ao non fornecer este material nin "realizarlles as probas PCR" para detectar a enfermidade vírica unha vez finaliza a súa quenda semanal, segundo aseguraron nun comunicado este mércores.

Neste sentido, CC.OO explicou que os empregados traballan durante sete días seguidos "en quendas de doce horas" nos que "están confinados" cos pacientes e que despois "manteñen unha corentena de catorce días consecutivos nos seus domicilios antes de iniciar unha nova quenda".

A este sindicato cónstalle que "o persoal que acabou a súa última quenda regresou á súa casa sen as mínimas medidas de seguridade, sen realizarlles test, sen máscara nin outro material que permita garantir a súa propia protección nin a da súa familia", a pesar de que "poden ser potenciais portadores do virus".

Así as cousas, para CC.OO resulta "inadmisible e incomprensible" que as Forzas e Corpos de Seguridade do Estado estean a repartir máscaras de "forma masiva" entre a cidadanía, pero que "se lles negue aos profesionais que están en contacto directo con COVID-19".