A Xunta pecha unha residencia privada polas súas irregularidades e deixa a 29 maiores da Fonsagrada pendentes de ser recolocados

O Concello da Fonsagrada (Lugo) atópase á espera de coñecer a recolocación de 29 persoas maiores tras o peche a semana pasada dunha residencia privada polas malas condicións dos anciáns nestas instalacións, con 23 prazas.

Os maiores atópanse agora no HULA, á espera dun novo destino

Así o explicou este luns o alcalde da Fonsagrada, Carlos López, en declaracións a Europa Press, quen confirmou que os 29 maiores permanecen, de momento, no H

ospital Universitario Lucus Augusti (HULA) de Lugo á espera de ser recolocados.

O rexedor destacou que o Concello está "a facer xestións" coa Consellería de Política Social para saber "que pasos hai que dar" e para que lles "informen das medidas que van tomar e se teñen pensado trasladalos e a que residencia".

Respecto diso, o rexedor confirmou que os maiores desaloxados, procedentes de "varias provincias" galegas, "seguen no hospital", onde "lles situaron unha sala para que estean xuntos", abundou.

O alcalde explicou que familiares dalgúns dos maiores afectados "queren que queden na residencia pública da Fonsagrada", en funcionamento desde febreiro e que conta con "27 prazas", matizou.

FEITOS

O Goberno galego ordenou o peche cautelar das vivendas comunitarias Burón I e II, unha residencia privada situada no termo municipal da Fonsagrada, tras constatar as malas condicións das persoas maiores que se atopaban nesas instalacións.

A denuncia partiu dun informe emitido polos Servizos Sociais da Fonsagrada o pasado martes, no que se advertiu á Administración autonómica de unha posible situación de malos tratos aos residentes do centro e de diversas irregularidades, tanto nas condicións como na atención aos mesmos.

Ante a situación alertada no documento, a inspección de Servizos Sociais da Xunta desprazouse ao centro para corroborar os feitos sinalados na denuncia e tamén remitiu un aviso a corpo de Garda Civil.

Deste xeito, os efectivos desprazados constataron a situación na que se atopaban estes residentes, 29 anciáns nun centro con 23 prazas e en condicións inadecuadas, feitos que motivaron o peche inmediato das instalacións.