​“Tes internet?”, pregunta a USC aos seus alumnos nun cuestionario online

A Universidade de Santiago de Compostela enviou un cuestionario ao conxunto do alumnado con preguntas sobre que clase de conexión a internet teñen no seu domicilio.

O cuestionario espertou críticas entre un sector do alumnado, preocupado pola incerteza que rodea ao final do curso académico, xa que a día de hoxe, cando apenas falta un mes para o inicio dos exames, os alumnos de graos e máster aínda descoñecen como van ser avaliados.

Antonio López, reitor da USC

As preguntas que a universidade fai aos seus alumnos están orientadas a coñecer de primeira man a clase de ferramentas dixitais das que dispoñen nos seus domicilios. Que tipo de conexión a internet teñen en casa, se  posúen webcam e micrófono ou como é a cobertura a internet da que dispoñen son algunhas das preguntas do formulario.

O documento en cuestión, que ten que ser respondido antes o sábado 11 de abril ás 11 horas, parece un primeiro paso a definir como de capacitado está o alumnado para realizar unha avaliación telemática, xa que a día de hoxe a opción que goza de máis peso dentro do sistema universitario entre as baralladas para definir o final de curso é realizar exames telemáticos.

CUESTIONARIO “SURREALISTA”

Con todo, o cuestionario non foi ben recibido entre parte dos alumnos, que consideran “surrealista” a formulación da USC, especialmente a estas alturas, cando os alumnos levan xa un mes confinados nas súas casas. Hai que ter en conta que todos os alumnos que non dispoñan de conexión a internet en casa ou no seu teléfono son, consecuentemente, alleos a esta enquisa, polo que non poderá chegar á totalidade dos matriculados en graos e másteres.

Doutra banda, un de cada tres fogares de familias galegas con fillos en idade escolar non goza dunha boa conexión a internet, segundo reflicte unha enquisa de Confapa-Galicia respondida por máis de 6.200 persoas. Aínda que a maioría dos enquisados son de infantil, primaria e ESO, nesta situación de confinamento son datos facilmente extrapolables aos universitarios.

Dos enquisados un 29,72% negou ter acceso a Internet con capacidade para videoconferencia ou formación virtual. Pola súa banda, máis do 60% dos alumnos ten que compartir o seu equipo co resto da familia, algo que se agrava no caso de que os pais teñan que teletrabajar. Ademais, o 20% non ten espazo de traballo propio para realizar as súas tarefas.