Toda Galicia preto de ter test rápidos que se fan no coche

As autoridades sanitarias lembran que esta proba realízase con indicación médica e cita previa

O Servizo Galego de Saúde implantará en todas as áreas sanitarias o novo sistema habilitado para realizar as probas do coronavirus aos pacientes desde os seus propios vehículos e sen que teñan que baixarse dos mesmos. Iso si, as autoridades sanitarias lembran que só se fará este test ás persoas que teñan prescrición facultativa e cita previa.

O facultativo ten que prescribir a realización deste test no marco dos criterios establecidos nos protocolos e quedará rexistrado na historia clínica electrónica do paciente. Con esta medida, remarca Sanidade, búscase complementar e axilizar o sistema de recollidas de mostras a domicilio, que viron como aumenta a súa demanda nos últimos días.

O novo sistema, coordinado e priorizado polo servizo de Medicina Preventiva dos hospitais, permite axilizar tempos, xa que posibilita que os cidadáns se despracen en coche ao hospital, e ademais diminúe a utilización dos equipos de protección individual (EPI), xa que mentres cada visita a domicilio supón un cambio de EPI, os profesionais van utilizar un só equipo por quenda de traballo, sen necesidade de cambialo con cada paciente.

Na actualidade, estes test xa funcionan en Vigo, Ourense e Lugo. Está previsto que este venres empece na Coruña e Pontevedra, e o luns, en Santiago e Ferrol.

061, PARA CASOS GRAVES E EMERXENCIAS
Nun comunicado, a Consellería de Sanidade lembrou, ademais, que os cidadáns deben recorrer ao número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.

Ademais, o Sergas ten ao dispor dos cidadáns a web 'https://coronavirus.sergas.gal', na que se pode consultar información dirixida á poboación, aos profesionais sanitarios e a outros colectivos.

Nesta páxina tamén se pode atopar un test interactivo, elaborado por persoal sanitario, para proporcionar á poboación un sistema áxil e inmediato no que atopar información actualizada sobre cuestións relacionadas co coronavirus.

Ademais, o feito de que o test personalice as respostas, a través de preguntas concretas, permite ofrecer recomendacións adaptadas á situación particular de cada persoa.

Así mesmo, o departamento sanitario galego ten aa disposición da poboación o teléfono 900 400 116, que foi reforzado con máis persoal, para dar información xeral sobre o coronavirus.

RECOMENDACIÓNS
Os técnicos da Dirección Xeral de Saúde Pública reiteraron as recomendacións consensuadas entre as comunidades autónomas e o Ministerio de Sanidade, e lembran que, en liñas xerais, aconséllase adoptar as medidas de autoprotección e limitación da diseminación do virus común a calquera infección respiratoria, como a gripe.

Así, extremarase a hixiene de mans, lavándoas frecuentemente, especialmente despois de toser ou soarse, e cubrirase o nariz e a boca cun pano --preferentemente desechable-- ao toser ou esbirrar, ou se non se dispón de pano, na cara interna do cóbado. Ademais, evitarase tocar os ollos, o nariz e a boca coas mans.