​Abdulaye Ba será o recambio de Somma no Deportivo da Coruña

A falta de facerse oficial, o central senegalés cubrirá o oco deixado polo central italiano, lesionado de longa duración.

Fumata branquiazul en Riazor. O Deportivo da Coruña pechou a incorporación do central senegalés Abdulaye Ba, que chega desde Vallecas cedido ata final de tempada. Desta forma, Fernando Vázquez consegue a adquisición dun central para dotar de equilibrio a un equipo que nos últimos encontros volveu adoecer da fraxilidade defensiva que o caracterizaba ata a chegada do técnico. Sen Somma, lesionado de longa duración, Ba ten o labor de ser un dos líderes da parcela defensiva deportivista.

FALTO DE RITMO

Ba é un defensor que destaca polo seu impoñente físico -1,97m- e a súa forza, dous elementos que o levaron a engrosar as filas de Porto ou Fenerbahçe. Tan irregular como portentoso, o senegalés viña de ser a pasada campaña uno dos alicerces do equipo franjirrojo, pero este curso viviu no ostracismo, sempre á sombra de Catena, Milic, Salvejich ou mesmo Mario Suárez. Nesta tempada o internacional con ‘Os leóns da Teranga’ só suma 64 testemuñais minutos, todos eles xogados nun partido de Copa do Rey contra o Tarazona.

O caso de por que Ba leva toda unha tempada en branco é un verdadeiro misterio. A pesar de que o sempre controvertido Paco Jémez deixou claro que non contaba co central, desde a entidade vallecana rexeitaron innumerables propostas que evitaron a venda do xogador, que agora chega a Riazor coa intención de resarcirse e demostrar que segue sendo un portento físico. Non cabe dúbida de que o feito de que Ba leve parado todo o ano xogou a favor do cadro herculino á hora de lograr a súa contratación.

Con todo, a natural falta de ritmo e a adaptación a un sistema de cinco centrais poden ser un condicionante para un xogador que está obrigado a queimar etapas en tempo record para axustarse canto antes aos mecanismos dun persoal que non ten nin un só segundo que perder.