Tres xogadoras do Emevé de voleibol deteñen a un presunto ladrón tras unha persecución por Lugo

Axentes da Policía Nacional adscritos á Brigada de Seguridade Cidadá de Lugo detiveron a un home, veciño da cidade de 42 anos e con máis dunha ducia de arrestos anteriores, por un delito de roubo con violencia. A detención produciuse tras ser interceptado por tres xogadoras profesionais do equipo de voleibol Emevé despois de ser perseguido por un cliente do bar no que tentou roubar.

Xogadoras do Emevé voleivol de Lugo nun partido nunha imaxe da súa instagram

ATRACO A CARA CUBERTA NA ZONA VELLA

Segundo relatou a Policía Nacional, os feitos ocorreron este mércores na zona de lecer do centro da cidade de Lugo, na parte monumental, cando este home entrou nun local de hostalería coa cara tapada e cun gorro na cabeza, onde se dirixiu á camareira, á que avisou de que era un atraco e que lle dese todo o diñeiro que había na caixa.

Neses instantes o atracador deuse conta de que no local había un cliente, polo que antes de poder facerse co botín que pretendía, saíu precipitadamente do establecemento, e detrás del foi un cliente.

CHAMADA Á POLICÍA

Entón por parte da vítima e empregada do local avisouse á sala do 091 do que acababa de ocorrer, polo que se puxo en marcha un dispositivo de procura e localización do autor dos feitos.

Ao tempo recibiuse outra chamada, nesta ocasión do cliente que vai perseguindo ao atracador, o cal narraba ás dotacións, a través do servizo da sala operativa do 091, por onde transitaba.

AS DEPORTISTAS ENTRAN EN ACCIÓN

Ao chegar á altura da rúa Quiroga Ballesteros coa Praza do Ferrol, o cidadán e cliente do local que perseguía ao autor do atraco, gritou aos transeúntes, "ao ladrón", momento no que tres xogadoras profesionais do Emevé, que camiñaban pola zona, viron a situación e deixaron as pertenzas que levaban encima no chan e procederon a perseguir ao delincuente, ao que interceptaron e retiveron ata a chegada das dotacións policiais.

Na zona do antigo cuartel de San Fernando finalmente foi detido por parte da Policía Nacional o presunto autor da tentativa de atraco.