Un operario morto en Chantada e outro ferido tras a caída dunha árbore

Un operario faleceu na mañá deste luns despois de caerlle encima unha árbore cando realizaba o seu traballo no monte en Sabadelle, na localidade lucense de Chantada.

Segundo informou o 112, outro traballador tamén resultou ferido e foi evacuado por persoal de Urxencias Sanitarias de Galicia-061.

Tras recibir a chamada de alerta do persoal sanitario, sobre as 11,00 horas deste luns, na que comunicaba a saída do helicóptero medicalizado con base en Ourense para asistir a un traballador ao que lle caía unha árbore encima, os xestores do 112, pasaron aviso á Garda Civil, á Policía Local e a Protección Civil.

Tamén foron informados os Bombeiros de Chantada para axudar na evacuación dos accidentados, pois a zona presentaba dificultades de acceso ao persoal médico, aínda que, finalmente, non foi necesaria a súa intervención, concretaron por parte do 112.

Ao lugar, confirmaron a Europa Press fontes sanitarias, o 061 enviou unha ambulancia, un médico e o helicóptero medicalizado con base en Ourense para atender a dous pacientes, un dos cales faleceu no sitio do sinistro, mentres que o outro foi evacuado na aeronave ao Hospital Universitario Lucus Augusti (HULA) de Lugo.