Dianteiro do Santiago Futsal renuncia a un gol para que atendan a un rival lesionado (Vídeo)
É unha decisión que tes que tomar en décimas de segundo e é algo que se inculca, tamén na base do Lumieira" declarou a posteriori.
Unha gran ovación da afección e do equipo rival. Isto é o que apañou Adri Pirata a cambio de tirar o balón fóra cando tiña á súa disposición un gol cantado.
O dianteiro do Santiago Futsal presionaba a un xogador do Manzanares, Álex Velasco. De súpeto, este derrubouse ao chan proferindo un berro. Adrián Rodríguez Mosteirín quedou só diante do porteiro e cun compañeiro liberado, disposto a marcar a porta baleira. No canto de xutar ou pasar ao seu compañeiro, Pirata lanzou a pelota fóra.
O porteiro rival agradece a Pirata o seu xesto
Dáse a circunstancia que Velasco xogara antes para o Santiago Futsal. Con todo, Adrián Rodríguez explica que non lle deu tempo a pensar niso. Como se ve no vídeo da Liga Nacional de Fútbol Sala, a súa resposta foi inmediata.
O Santiago Futsal gañaba 0-3 e acabou gañando 1-3. Moito máis gañou o xogador lucense. O vídeo do seu xesto deportivo suma nun día máis de 10.000 visitas. O mozo asegura en El Correo Gallego, ademais, que recibiu moitas mensaxes de felicitación, mesmo de países distantes como Irán ou Italia.
"Este é un club no que priman certos valores, prestóuseme a ocasión e saíume facer iso. É unha decisión que tes que tomar en décimas de segundo e é algo que se inculca, tamén na base do Lumieira" declarou a posteriori.
Escribe o teu comentario