​Arbo comeza a preparar a ‘Festa da Lamprea Seca’ co concurso de carteis ‘Brais Alonso’

O concurso de cartelería para a ‘Festa da Lamprea Seca’, que afronta a súa XXV Edición, supón o pistoletazo de saída para os preparativos da festividade.

Celebración da Festa da Lamprea Seca | Foto: Concello de Arbo

Para celebrar os 25 anos da Festa da Lamprea Seca, o Concello de Arbo, proclamado como ‘A vila dalamprea’, iniciou os preparativos para o primeiro cuarto de século de vida desta festividade, que terá lugar os días 8 e 9 de agosto. E como primeiro paso, o consistorio convocou un novo concurso de carteis con motivo desta XXV Edición.

O concurso, bautizado co nome de ‘Brais Alonso’, inicia así o seu VII Edición, e do sairá o cartel oficial da festa gastronómica, unha das máis importantes da localidade pontevedresa.

"As propostas serán entregadas no soporte orixinal e electrónico á máxima resolución. Poderán presentarse ata dous carteis por participante. Ademais presenta interesantes premios para os deseños máis orixinais, representativos e creativos”, sinala o comunicado do goberno municipal.

Do mesmo xeito, o gañador do concurso recibirá un premio de 250 euros, mentres que o autor do segundo mellor cartel será dotado dun premio de 150 euros. Aqueles que desexen participar no concurso dispoñen ata o 15 de marzo para presentar os proxectos.

O alcalde arvense, o popular Horacio Gil, resaltou que este concurso vai máis aló das fronteiras de Pontevedra. “Tanto o concurso de carteis Brais Alonso como o que convocamos para a Festa da Lamprea están a experimentar un gran éxito, recibindo propostas desde diferentes partes de España”, afirmou o rexedor, que sostivo á súa vez que estas festividades ao redor da lamprea sitúan á localidade “en España” e “no mundo”.