A Xunta insiste que a falta de pediatras e médicos de familia é de Madrid
Vázquez Almuiña abordará outros temas como o futuro do MIR ou a convocatoria do Consello Interterritorial sobre financiamento
Vázquez Almuiña pide ao ministerio de Sanidade que reforme o exame do MIR.
O Conselleiro de Sanidade, Jesús Vázquez Almuiña, trasladará ao ministro Salvador Illa, a "necesidade" de eliminar a taxa de reposición como unha das "actuacións prioritarias" para "afrontar a carencia de especialistas" no Sistema Nacional de Saúde e "favorecer a estabilidade dos profesionais a través das ofertas públicas de emprego".
Desta forma, Almuiña enviou unha carta ao titular nacional de Sanidade na que lle solicita un encontro persoal e ofrécelle a "máxima disposición" para traballar pola "mellora da sanidade española" e a "sustentabilidade" do sistema nacional de saúde, segundo informou nun comunicado o departamento galego competente.
Ademais, o conselleiro pide abordar outros temas como o futuro do sistema común de formación sanitaria especializada (MIR) ou os problemas de subministración de medicamentos en España para o que Sanidade "leva solicitando desde hai meses medidas ao Ministerio".
Así mesmo, Almuiña "reiterará a importancia" de convocar o Consello Interterritorial sobre financiamento sanitario que, segundo afirma a consellería, "é un compromiso inaprazable adquirido polo Ministerio de Sanidade, que quedou pendente de realización".
Escribe o teu comentario