Atalaya, a mineira de Touro, "terá que parar en febreiro" se non logra un novo permiso para Río Tinto

O único negocio produtivo de Atalaya Mining podería sufrir un duro golpe nas próximas semanas, se a Xunta de Andalucía non concreta as súas promesas dun pronto auxilio administrativo. "Atalaya Mining non contará permisos de explotación mineira e terá que parar a súa actividade en febreiro" advirte USO, o principal sindicato das minas de Río Tinto. 

Eses permisos están pendentes dunha nova Autorización Ambiental Unificada. A anterior AAU tombouna a xustiza, en sentenza firme, por mor dunha denuncia de Ecoloxistas en Acción.

Balsas na mina de Huelva

Para Atalaya todo era un defecto formal que, ademais, a Xunta prometeu emendar rápido con outra AAU. Con todo, pasan os meses, a sentenza é de Abril, e non hai rastro da prometida nova AAU. Isto, loxicamente, desatou a preocupación dos traballadores de Río Tinto.

Onte visitaron as instalacións alcaldes locais acompañados por os sindicalistas. "Xa en novembro, a delegada do Goberno en Huelva anunciou que a autorización sería inminente, e xa entramos en 2020 sen noticias dela. Unhas mil familias de Riotinto dependen do emprego da mina", queixouse o presidente do comité de empresa por FI-USO, Marco Sierra, segundo recolle Diario de Huelva

Calquera contratempo en Río Tinto afecta á viabilidade do proxecto de reapertura da mina de cobre en Touro - O Pino. O plan galego, que leva máis dun ano empantanado nos corredores da Xunta, esixe un forte investimento e unha empresa solvente detrás, polo que unha eventual paralización de Río Tinto sementaría máis dúbidas sobre Atalaia Minning, financiadora do proxecto a través de Cobre San Rafael, dado que o xigante onubense é a única mina que ten en funcionamento.