O Blue Star é un "exemplo de solidez e de resposta" ante unha emerxencia para o Goberno

O delegado do Goberno en Galicia, Javier Losada, puxo o caso do rescate do quimiquero 'Blue Star' da ría de Ares (A Coruña) como un "exemplo de solidez e de resposta" ante unha emerxencia deste tipo.

O Blue Star rescatado en Ferrol

Durante o acto de conmemoración do 25º aniversario do Dispositivo de Tráfico Marítimo de Fisterra, celebrado este sábado en Muxía (A Coruña), Losada reiterou "o compromiso" do Executivo estatal co mantemento da seguridade marítima e a protección da costa e os recursos mariños da Comunidade galega.

Na súa intervención, o delegado do Goberno destacou "o esforzo" dos impulsores do corredor de Fisterra. Neste contexto, lembrou que nos 90 presentaron a solicitude para afastar o paso de buques mercantes da costa polo "elevado risco" que implicaba a súa traxectoria para os pesqueiros que faenaban na zona.

Ademais, Losada subliñou que o entón secretario xeral de Transportes, Manuel Panadeiro, recolleu a proposta "e acompañouna" ata a súa aprobación final pola Organización Marítima Internacional. Así, engadiu que naquela mesma lexislatura o Goberno creou a Sociedade Estatal de Salvamento Marítimo (Sasemar) e inaugurou o Centro de Control de Fisterra no Monte Enxa, en Porto do Son.

Todo iso "supuxo no seu conxunto un antes e un despois na historia da seguridade marítima de Galicia", segundo incide a Delegación do Goberno.

Javier Losada insistiu no "servizo crave" que presta o dispositivo de Fisterra 25 anos tras a súa creación. En total, un total de 36.345 buques foron identificados en 2018 neste servizo por parte de Salvamento Marítimo. Deles, case un terzo (12.714) transportaban mercadorías perigosas, na súa maioría hidrocarburos.