Os directivos do Sergas imputados pola morte de pacientes con Hepatites C quedan libres de cargos
A Xunta sae xudicialmente indemne, polo menos por agora, dunha das maiores polémicas da década na sanidade galega; a lentitude coa que se estendeu o tratamento do Sovaldi, que non chegou a tempo de salvar a varios pacientes.
Unha pasada protesta da plataforma de afectados
O XUÍZ ALEGA QUE OS MEDICAMENTOS AÍNDA ERAN EXPERIMENTAIS
"Non podemos afirmar que a morte ou falecemento dos pacientes sexa imputable causalmente aos investigados", indica o fallo, do que informou o Tribunal Superior de Xustiza de Galicia (TSXG). Nel, engádese que "o falecemento sobreveu por causas alleas á demora, omisión ou dilación na tramitación das peticións ou solicitudes de aplicación dos novos fármacos".O xuíz Andrés Lago Louro destaca que os medicamentos "achábanse aínda en fase case experimental e cuns resultados que aínda eran incertos, de aí a necesidade de que as autoridades sanitarias deseñasen mecanismos ou procedementos destinados a precisar con sumo coidado aqueles casos nos que estaría indicada a súa aplicación".
CABE RECURSO
O auto, que pode ser recorrido, sinala que tampouco se pode concluír que, de aplicarse aos pacientes os novos fármacos, ía evitarse o seu falecemento.
"Se analizamos o exhaustivo informe que foi emitido polo Instituto de Medicina Legal de Galicia (Imelga), a conclusión que se extrae é que o falecemento dos pacientes produciuse por causas alleas á subministración dos novos fármacos", recalca o xuíz, quen engade que do informe forense inférese que os novos tratamentos antivirais "o que conseguían era unha eficacia moi alta á hora de eliminar o virus da Hepatite C, pero iso non quere dicir que os pacientes se curasen".
Escribe o teu comentario